Club
El Real Uviéu fundóse na capital del Principáu d’Asturies el 26 de marzu de 1926, de la unión del “Real Stadium Club Ovetense” y el “Real Club Deportivo Oviedo”. La entidá nueva presentóse en sociedá xugando un partíu amistosu n’Uviéu contra l’Arenas de Guecho’l 1 de mayu de 1926.
El conxuntu uviedín foi quién en pocos años a ser ún de los equipos de más sonadía del fútbol español. N’acabando la temporada 1932-33 conviritióse nel primer club del Principáu d’Asturies que xubía a Primer División. Llogró l’ascensu nel so campu, l’estadiu de Buenavista, que s’inaugurare con un partíu ente España y Yugoslavia’l 24 d’abril de 1932.
El so debú en Primera foi de luxu, porque s’impunxo al Barcelona por 7 goles a 3, lo que tovía ye anguaño’l meyor principiu na máxima categoría del fútbol español d’un equipu xubíu de Segunda.
Foi candidatu al títulu de Lliga delles veces, coles sos famoses “delanteres eléctriques”, que yeren de les más goliadores del país, pero la guerra civil española atayó les sos posibilidaes cuando yera ún de los favoritos principales pa proclamase campeón na temporada 1936-37, que nun llegó a xugase pol conflictu bélicu.
El Real Uviéu llogró delles clasificaciones brillantes na categoría máxima del fútbol español. Acabó nel tercer puestu de Primer División hasta en trés ocasiones, la postrera na temporada 1962-1963. El Real Uviéu llograba na temporada 1990-91 la so primer clasificación pa una competición europea: la Copa de la UEFA.
A lo llargo de les décades vistieron la camiseta azul xugadores de la talla d’Oscar, Zabala, Lángara, Herrerita, Emilín, Sánchez Lage, Tensi, Galán, Marianín, Carlos, Prosinečki, Jokanović, Paulo Bento, Dubovský…. Futbolistes de sonadía internacional que llevaron bien alto’l nome del Real Uviéu.
En payares del 2012 la entidá vivió ún de los sos momentos más trescendentales; empobinada a la desapaición si nun iguaba con urxencia los sos problemes económicos, convocó una ampliación de capital que recaudó cuatro millones d’euros gracies a l’aportación de miles d’accionistes de los cinco continentes y del Grupo Carso, propiedá del empresariu mexicanu Carlos Slim, que d’esa manera entró nel Real Uviéu como accionista principal, posición que reforzó depués nuna ampliación nueva de capital.
El Real Uviéu xuega los sos partíos como local n’Estadiu Municipal Carlos Tartiere. Les sos instalaciones auxiliares d’El Requexón, patrimoniu del propiu club, tán asitiaes na rodiada de la ciudá. Nelles realiza los sos entrenamientos la primer plantiya, amás del so equipu filial, mentes que los 14 equipos de categoríes inferiores, nutríos con más de 280 neños, desenvuelven l’actividá nes instalaciones municipales Tensi, asitiaes en recintu deportivu La Pixarra, na mesma ciudá d’Uviéu.
La cifra d’abonaos de la entidá algamó’l tope na temporada 2015-2016, con alredor de 21.000 abonaos rexistraos. La media de la última década, na que l’equipu permaneció lloñe del fútbol profesional, superó los 12.000 abonaos. Amás, la masa social del Real Uviéu presume de más d’un centenar de peñes oficiales, repartíes per trés continentes, y d’alredor de 50.000 accionistes de más de 125 países depués de la última ampliación de capital del club, realizada n’añu 2015.