Temporada nueva, ilusión intacta. El Real Oviedo viaxaba hasta La Coruña pal so estrenu lligueru na temporada 2024/2025 de LaLiga Hypermotion. El cuadru gallegu yera'l primer rival del cursu para los azules no que tamién sería l'estrenu nel banquín carbayón d'un Javi Caleya qu'allinió'l siguiente once en Riazor: Aarón Escandell, Lemos, Costas, Dani Calvo, Rahim, Del Moral, Sibo, Dotor, Sebas Moyano, Paulino de la Fuente y Alemão.
Barganal d'un millar de oviedistas acompañaron a los suyos nesti debú lligueru pal combináu uvieín que nun pudo empezar de meyor forma. Nel minutu 5 d'alcuentru, una gran cabezada d'Alberto Del Moral tres una falta botada a la perfección por Paulino terminaba no fondero de les mallas y ponía el primeru para'l Real Oviedo. Magar qu´el tantu foi anuláu en primer instancia, el VAR indicó que nun esistía fuera de xuegu y el 0-1 yera una realidá.
Tres el tempraneru gol azul, la primer metá trescurrió con cierta igualdá ente los dos conxuntos. El Deportivo de la Coruña yera quién tenía'l balón anque'l Real Oviedo nun sufría. Aarón Escandell apenes tuvo qu'intervenir y la primer metá tocaba al so fin cola ventaya a favor de los asturianos nel marcador. Descansu.
El pasu por vestuarios traxo consigo'l cambéu de Lucas Ahijado por Lemos pa la segunda metá onde los de Javi Caleya volvieron amosar la so solidez defensiva. Nel 61´, Cazorla y Hassan entraron al terrén de xuegu y sería precisamente Lucas, qu'había entráu va unos minutos, quién tendría la más clara. Un bon centru de Rahim dende la esquierda yera rematáu de volea pel llateral derechu pero'l so remate, que diba perbién empobináu, tocó nel llombu d'un defensor pa unviar el balón a córner.
El Dépor tamién tuvo dalguna ocasión anque un seguru Aarón Escandell evitó'l tantu del empate. Yá na recta final, Cazorla inventóse un pase sensacional pa dexar mano a mano a Paraschiv anque'l rumanu nun tuvo atináu na definición y el so remate foi esviáu por Germán Parreño. Con esta última ocasión, xuníu al aceleríu deportivista final, el partíu remataba y los trés puntos viaxar hasta la capital del Principáu pa romper asina la racha de 25 años ensin ganar na primer xornada nel fútbol profesional.
