Primer derrota del 2025

El Real Oviedo cayó ganáu esti domingu énte'l Deportivu de la Coruña por 1-2 y remata asina la so racha de siete partíos consecutivos ensin perder. Los gallegos adelantráronse nel marcador con un bon tantu de Soriano anque Chaira punxo l'empate con otru gol de bella factura. Yá nos últimos minutos del choque, Ximo Navarro dio-y los trés puntos a los visitantes. 

 

Con Sibo como única novedá nel once en sustitución de De la Foz. Asina salió'l cuadru carbayón a esta xornada númberu 29 de LaLiga Hypermotion onde los uvieinos buscaben allargar el so gran estáu de forma. El duelu nun empezó bien pa los de Calleja y nuna acción de córner llego'l 0-1. Mario Soriano engabitó'l balón botáu dende la esquierda p'anotar un golazu énte'l que Aarón Escandell nada pudo faer.

 

Chaira punxo la igualada nel minutu 38 con otru gran tantu pa poner les tables. Tres el pasu por vestuarios, l'Uviéu trató de buscar la victoria y raspióla con una acción perclara de Alemao que se quedó mano a mano énte Leite. Sicasí, el so remate, inexplicablemente, colóse percima del travesal. 

 

Portillo, de la Foz y Viñas salieron al campu pa tratar de camudar les coses pero'l segundu nun llegaba. Cuando paecía que l'empate sería la resultancia final, Ximo Navarro nel 91´ aprovechó'l refugue tres un paradón de Aarón p'anotar el tantu de la victoria. Xarru d'agua frío y puntu y final a un partíu nel qu'el Dépor salió victoriosu.