Trés puntos más cerca del oxetivu

There are no reactions yet. Be the first!

Ambientazu de luxu nel Carlos Tartiere para vivir la penúltima xornada de LaLiga Hypermotion. El Real Oviedo vía les cares col FC Andorra nun alcuentru clave pal playoff y pal que l'entrenador del conxuntu azul, Luis Carrión, allinió un once formáu por: Leo Román, Viti, Oier Luengo, Dani Calvo, Pomares, Colombatto, Seoane, Cazorla, Borja Sánchez, Masca y Alemão.

Nun s'engurrió'l combináu andorranu nel municipal uvieín. El cuadru visitante, al que namá-y valía ganar pa forfugar les sos escases opciones de permanencia, tuvo'l balón mientres la primer metá onde'l Real Oviedo tuvo que llamentar la perdida de Santi Cazorla nel minutu 29. El mediocampista nun pudo siguir nel terrén de xuegu y Carrión introdució a Paulino de la Fuente. Magar la mala noticia, los uvieinos tuvieron la más clara de la primer metá con un remate de zurda a la media vuelta de Borja Sánchez que se coló raspiando'l palu.

Los postreros 15 minutos del primer periodu trescurrieron con más igualdá ente dambos conxuntos onde nin Leo Román nin tampoco Nicolás Ratti tuvieron qu'intervenir por demás. 0-0 y descansu. Tres la continuación, el carbayones salieron con una marcha más y Masca desamarró la llocura con un golazu dende fora de la área. El portugués rompió l'empate inicial y punxo per delantre a los azules. Paulino de la Fuente y Sebas Moyano entraron nel 66´ pa meter una marcha más al equipu y precisamente sería Paulino el que metería'l segundu. El cántabru ponía tierra pel mediu y los trés puntos taben más abargana.

El FC Andorra nun podía col Real Oviedo qu'emburriáu pol Carlos Tartiere nun frenó les sos llegaes en busca d'un tercer gol que significara la sentencia. Otra vegada Paulino de la Fuente superaba a Nicolás Ratti pa poner puntu y final a un partíu redondu onde l'oxetivu, que nun yera otru que ganar, consiguióse en demasía. Trés puntos más cerca del oxetivu y agora a pensar en Eibar. El conxuntu carbayón llega a la última xornada dependiendo de si mesmu p'apostar a final de temporada l'allampáu playoff d'ascensu a Primera División.