Arguyosos de los nuesos. El Real Oviedo cai derrotáu por dos goles a cero énte'l RCD Espanyol en Barcelona y quédase ensin l'ascensu nuna temporada d'ilusión onde l'equipu dar tou y engarró hasta'l final pol suañu de tornar a la máxima categoría del fútbol español.
La ventaya de la ida fixo que los locales salieren con tou dende'l pitíu inicial en busca d'un gol col que metese de llenu na eliminatoria. Tres un primer periodu d'acercamientos del cuadru catalán, y nel que'l combináu carbayón trataba de caltener la so meta a cero, Puado abrió la llata nel 44.
El delanteru del Espanyol aprovechó un córner a favor pa llibrase de la marca de Seoane y rematar na área pequena énte un Leo Román que nada pudo facer. 1-0 ya inyección de moral pa los de Barcelona que fixeron sangre con un segundu tantu antes del descansu. Nel descuentu del primer periodu, otra vegada Puado foi l'encargáu de furar la meta uvieina y doblar la ventaya perica. 2-0 y xarru d'agua frío pa un Real Oviedo que se colaba al descansu precisando un gol col que forzar la prórroga.
Tres el pasu por vestuarios, Luis Carrión movió'l banquín ya introdució dos cambeos. Abel Bretonos y Borja Sánchez entraron al terrén de xuegu pa camudar les coses y el Real Oviedo salió con una marcha más na segunda metá. Los carbayones buscaron el gol énte un Espanyol que trató aguantase la so ventaya y facer dañu a los asturianos al traviés del contraataque.
Nel 63', Carrión metió más efectivos al campu y Santi Cazorla y Masca completaben l'ataque. El portugués tuvo una de les más clares pa los uvieinos de la segunda parte anque l'ariete nun llegó por pocu a un bon centru d'Abel Bretones dende la esquierda. Yá con Borja Bastón sobro'l verde pa los postreros 15 minutos, el Real Oviedo reclamó penalti por un agarrón de Cabrera sobre'l "9". Magar ello, Cordero Vega nun señaló nada y el 2-0 siguía reinando nel marcador.
Yá nel descuentu, y tres un remate de Borja Sánchez que nun atrapó'l porteru, Bastón tuvo la ocasión pola que tol uvieísmu rezaba anque'l so remate foi esviáu a saque d'esquina por Joan García. Con esta última acción el partíu tocaba al so fin y el suañu de tornar a Primer División esmucíase.
Arguyu, cabeza alta y nada que reprochar a un equipu col que l'uvieísmu volvió creer y a ilusionase. Agora toca llevantase, recargar piles y encarar con optimismu y ganes lo que ta por venir.
