Y llegó la segunda consecutiva, y fízolo con un conxuntu de la capital del Principáu intensu, que salía a buscar el gol dende los primeros minutos, nun Carlos Tartiere qu'acoyó la xornada 13 de competición para los azules, ente un Málaga desactiváu na primer metá polos homes de Ziganda.
Femenías; Lucas, David Costas, Dani Calvo, Mossa; Sangalli, Brugman, Jimmy, Viti; Obeng y Borja Basón fueron los escoyíos pol técnicu navarru p'apostar l'alcuentru que nos dexó la sobremesa d'esti últimu domingu d'ochobre, de tinte azul dende'l mesmu pitíu del colexáu.
La primer parte cayó del llau azul, con un Real Oviedo qu'entró perbién al partíu, amosando les sos intenciones de dir a pol choque, de consiguir la segunda victoria consecutiva de la temporada y de llograr tres puntos capitales nes aspiraciones oviedistas por esguilar puestos na clasificación. Los de Ziganda, bien ordenaos sobro'l verde del estadiu carbayón, tuvieron atinaos en defensa, ente un Málaga que solo tuvo un par de llanzamientos dende la frontera. El Real Oviedo dispunxo de les más clares d'esti actu, nes botes de los sos homes d'ataque. Peles bandes, los del Carlos Tartiere xeneraron peligru sobro la portería de Dani Martín, que nun pudo evitar el tantu azul nel minutu 19 del choque. Borja Bastón, a saque de córner, remató un bon balón y punxo el 1-0 nel marcador. Los del Cuco Ziganda apoderaron el xuegu y la posesión, ensin apenes conceder la pelota a los andaluces, que dispunxeron de dalguna contra, bien resuelta pola zaga azul. Cola resultancia de 1-0 llegar al descansu.
Na segunda metá vivióse un partíu d'ida y vuelta, con un Málaga marcáu pola urxencia de poner l'empate nel lluminosu, llevando'l xuegu mientres la primer parte del mesmu, y un Real Oviedo bien llantáu sobro'l verde, que s'emplegó para repeler el peligru malacitano. El andaluces punxeron el 1-1 nel marcador, y esto llevó a los de Ziganda a dar un pasu adelantre para consiguir desfaer la resultancia. Viti túvola nes primeres incorporaciones de Ziganda al partíu, y diéron-y aire y chispa al ataque oviedista. Matheus y Pierre tamién fixeron entrada nel partíu, qu'acabó col conxuntu de la capital del Principáu entornáu n'ataque, y teniendo, na cabeza de Borja Bastón, el so pagu. El madrilanu remató'l gran partíu que llevó a cabu anotando'l segundu na so cuenta particular en la tarde de güei, dándo-y la victoria a los de Ziganda.
De tres suman los de la capital del Principáu nel choque d'esta tarde ente'l Málaga, lo que-yos dexa algamar los diecinueve puntos y retayó puntos colos puestos de privilexu de la tabla. El Real Oviedo va xugar xornada entre selmana, moviéndose a Ipurua para vese les cares col Eibar.
