El Real Oviedo encaraba nesta ocasión el derbi asturianu y víase les cares col Real Sporting de Xixón na xornada númberu 26 de LaLigaHypermotion. Los uvieinos, que llegaben n'empatando énte'l Eldense nel Tartiere, buscaben collechar trés puntos bien importantes énte'l so máximu rival colos que siguir esguilando posiciones na tabla. Pa esta ocasión, el técnicu catalán, Luis Carrión, allinió un once formáu por Leo Román, Viti, Oier Luengo, Dani Calvo, Abel Bretones, Jimmy, Colombatto, Paulino, Sebas Moyano, Dubasin y Borja Bastón.
L'alcuentru nun pudo empezar peor pa los carbayones yá que nel minutu 2 de partíu Nacho Méndez punxo per delantre a los roxiblancos. Un bon disparu del "10" dende la frontera de la área sirvió pa poner el primeru nel marcador. Los de Miguel Ángel Ramírez apertaron mientres los primeres compases del choque anque'l pasu de los minutos fixo que'l Real Oviedo ganara presencia en campu contrario.
Paulino de la Fuente, nel 27', protagonizó la más clara pa los azules anque a la hora del disparu'l mediocampista nun llogró rematar una bon unviada d'Abel Bretones dende la esquierda. Cinco minutos más tarde, y a balón paráu, el cántabru nuevamente raspió l'empate pero la so cabezada colóse abargana del travesal de la meta defendida por C.J. Sánchez.
Tres la continuación, el guion de partíu nun camudó y el conxuntu azul siguió apoderando. Paulino volvió tener dos bones ocasiones pa poner el 1-1 anque los sos disparos coláronse enriba. Col Real Oviedo llegando con peligru sobro la meta rival llegaría la primera de los dos remanes polémiques nes que'l colexáu nun decidió señalar penalti. Nel 63', Sebas Moyano foi baltáu na área anque l'árbitru indicó falta. Alemão, Borja Sánchez y Santi Cazorla entraron na segunda metá pa tratar de revertir la situación y el brasileñu túvola. Un bon aviesu del ariete a puntu tuvo d'acabar en gol pero'l so tiru foi bloquiáu n'última instancia.
Yá na recta final del partíu, González Esteban volvió ser protagonista. Paulino foi baltáu dientro de la área pero'l colexáu nun indicó nada más dir al monitor a ver la xugada en siendo avisáu pol VAR. Los futbolistes del Real Uviéu, incrédulos, nun entendíen nada. Magar ello, los de Carrión nun cesaron nel intentu y atacaron hasta'l final en busca d'un empate que nun terminó de llegar.
D'esta forma, y sobro'l terrén de xuegu, el Real Uviéu coló d'El Molinón - Enrique Castro Quini con derrota y ensin nengún puntu pero cola cabeza alto y arguyoso pol partíu que xugara nel que tuvo que lluchar contra tou.
AST
