Derrota pola mínima nel estrenu en LaLiga Hypermotion

Nueva temporada para'l Real Oviedo en LaLiga Hypermotion. El combináu uvieín estrenábase esti llunes na competición doméstica y fízolo enfrentándose al Tenerife nel Estadiu Heliodoro Rodríguez López. Para esti primer alcuentru, el técnicu del conxuntu azul, Álvaro Cervera, allinió un once formáu por: Leo Román, Lucas, David Costas, Dani Calvo, Abel Bretones, Viti, Camarasa, Jimmy, Sebas Moyano, Hugo Rama y Borja Bastón.

 

La igualdá y respetu ente dambos equipos foi notable mientres los primerescompases del partíu, onde malapenes hubo ocasiones de peligru. Sicasí, el primer acercamientu claru de los locales terminó en gol. Enric Gallego aprovechó una bona intervención de Leo Román, en primer instancia, parematar a prestar y poner el primer gol nel marcador nel minutu 18. Los carbayones trataron de reponese del tantu inicial anque minutos más tarde una mala noticia pa los intereses azules. Lucas tenía qu'abandonar el terrén de xuegu tres una dura entrada de Nacho nel 26. Oier Luengo yera finalmente l'escoyíu pa ingresar al terrén de xuegu en llugar del uvieín y ocupar esi llateral derechu. Pese al contratiempu, el Real Oviedo trató d'igualar el choque lo antes posible. Hugo Rama tuvo cerca de poner el 1-1

con un gran disparu dende fora de la área que se coló llixeramente esviáu de la meta defendida por Juan Soriano.

 

Tres la continuación, Álvaro Cervera introdució un doble camudo. Mario Hernández y Paulino de la Fuente entraben al terrén de xuegu por Dani Calvo y Hugo Rama, respectivamente, col claru oxetivu de da-y la vuelta al marcador. Nel 57´, Borja tendría la más clara del partíu pa los azules pero'l so remate, tres un bon centru de Bretones dende la esquierda, estrellóla nel travesañu. La fortuna nun lu sonría al Real Oviedo y el 1-0 siguía imperando nel lluminosu.

 

Alemão, nel minutu 62, y Romario Ibarra, na recta final, tamién ingresaben al terrén de xuegu pa tratar de camudar les coses. El conxuntu de la capital del Principáu d'Asturies intentólo hasta'l final pero nun llogró disponer de nenguna acción clara de peligru pa llograr l'empate.

 

L'equipu, que va llegar a la capital asturiana mañana, va tornar a los entrenamientos el miércoles pa empezar a preparar el so próximu partíu de LaLiga Hypermotion. El conxuntu carbayón va vese les cares col Racing de Ferrol el próximu domingu a partir de les 17:00 hores no que va ser el so debú nel Carlos Tartiere.