El Carlos Tartiere despide la temporada con un nuevu trunfu

El Real Oviedo tornaba esti domingu al Carlos Tartiere pa encariar la última xornada nel municipal uvieín de la temporada. Los azules, que llegaben al alcuentru en sumando un puntu nel derbi asturianu, encariaben nesta ocasión el partíu correspondiente a la xornada 41 de la LaLiga Smartbank para midise al Racing de Santander. Los d'Álvaro Cervera formaben d'entamu con: Braat, Lucas, David Costas, Dani Calvo, Pomares, Borja Sánchez, Mangel, Camarasa, Moro, Borja Bastón y Leo Sequeira.

 

El conxuntu uvieín quería despidise de la so afición con un nuevu trunfu y asina lo demostró namás arrincar l'alcuentru. Raúl Moro, unu de los meyores xugadores del choque, foi'l futbolista más participativu na primer parte y nel minutu 9 ya crearía la primer ocasión de peligru. L'estremu realizó una gran xugada de personal per banda derecha que remató Bastón. Sicasí, el porteru visitante realizó una gran intervención y caltuvo l'empate inicial nel marcador.

 

El Racing nun llograba llegar sobro la meta de Braat y Borja Sánchez sería l'escoyíu pa volver meter el mieu na escuadra racinguista. El "10" realizó un gran disparu dende la frontera de l´área pero'l so disparu colóse llixeramente percima del travesal. Les ocasiones siguíen asocediéndose anque tan solo dos minutos más tarde llegaría'l tantu azul. Dani Calvo remataba a la perfección un gran centru de Camarasa tres un saque d'esquina pa poner el primeru nel marcador. L'allegría invadió al Carlos Tartiere que vería al so equipu colase al descansu per delantre nel lluminosu.

 

Tres la continuación, Abel Bretones sustituyó a Pomares nel carril esquierdu, anque la idea de partíu pal combináu d'Álvaro Cervera nun camudó. Sequeira nel 47' a puntu tuvo de poner el segundu pero'l so disparu, tres una gran xugada de Moro, foi deteníu por Ezkieta. Col pasu de los minutos, Álvaro Cervera introdució cambeos nel equipu y dio entrada a Masca, Rama y Vallejo por Leo Sequeira, Borja Sánchez y Borja Bastón. Les sustituciones dieron aire al equipu que buscó'l segundu con delles llegaes per banda anque los centros nun llograron atopar rematador.

 

La resultancia de 1-0 sería'l definitivu y con ello´l Real Oviedo llograría cerrar la temporada en casa con un trunfu énte la so xente. Con esta victoria, el conxuntu carbayón escala hasta la séptima posición y asítiase con 59 puntos, xusto percima del Andorra. La entidá azul va vese les cares na última xornada de LaLiga SmartBank énte la U.D. Levante.