El Real Oviedo viaxaba hasta Andorra para apostar esti llunes el postreru partíu de la xornada 6 de LaLiga Hypermotion. Los azules, qu'entraron al terrén de xuegu con camisetes de sofitu al so compañeru Víctor Camarasa, llegaben a esti choque cola clara intención de sumar la primer victoria de la temporada y para ello'l técnicu, Álvaro Cervera, apostaba por un once formáu por: Leo Román, Abel, Costas, Dani Calvo, Oier Luego, Viti, Luismi, Colombatto, Seoane, Moyano y Borja Bastón.
De menos a más. Asina podría resumise el primer periodu para'l combináu carbayón qu'ameyoró col pasu de los minutos y goció de les ocasiones más clares. L'Andorra, que tuvo mayor control del balón, nun s'averó con escesivu peligru sobro la meta de Leo Román nuna primer parte bien seria de los azules nel apartáu defensivu.
Yá nel minutu 30, Bastón tendría la primer ocasión clara pa los uvieinos. El delanteru remataba a la media vuelta un bon centru de Sebas dende la derecha pero'l so remate estrellóse nel cuerpu d'un defensor. Colombatto, darréu, tamién lo intentó con un disparu acrobáticu dende la frontera qu'atrapó finalmente'l porteru local.
Nel 37', Seoane mandó'l balón percima del travesal n'otra bona acción pa los carbayones anque'l 0-0 inicial siguía imperando nel marcador. Tres la continuación, el combináu andorranu volvió facese cola posesión del balón mientres el Real Oviedo esperaba poder facer dañu a la contra. Cuando paecía qu'esta sería la tónica habitual del partíu, el choque camudaría notablemente cola espulsión nel 64´ de Scheidler. El conxuntu de la capital del Principáu quedóse con unu más sobro'l terrén de xuegu anque les ocasiones y la superioridá nun terminaben de llegar.
A falta de 10 minutos pa llegar pal final, Luismi vía la segunda tarxeta mariella y el Real Oviedpo quedábase tamién con diez. Les males noticies nun cesaben pa los de Cervera y ye que darréu Seoane facía penalti sobro Lobete. El mesmu Lobete era l'encargáu de materializar la pena máxima y el 1-0 yá yera una realidá. Masca, Jimmy y Paulino ingresaben al terrén de xuegu na recta final pa camudar les coses anque la reacción nun llegó. Derrota pa los azules que van buscar camudar les coses la próxima xornada nel so alcuentru énte'l Real Valladolid nel Carlos Tartiere
