Victoria en Cartaxena para sumar el primer trunfu del añu

Arrincaba la xornada númberu 23 de LaLiga Hypermotion cola salida del Real Oviedo a tierres murcianes. Los de Javi Calleja visitaben Cartagonova pa midise al FC Cartagena no que significaba la primer salida del añu pa los azules. Tres l'empate nel derbi asturianu, los carbayones queríen llograr el primer trunfu del añu y pa ello'l míster del cuadru asturianu allinió un once formáu por: Aarón Escandell, Oier Luengo, Dani Calvo, David Costas, Pomares, Colombatto, Sibo, Portillo, Chaira, Hassan y Alemão.

 

Los primeros minutos de partíos fueron d'igualdá y de tantéu para dambos conxuntos. Delles xugaes individuales de Hassan por derecha y dalgún centru con peligru de Pomares por esquierda fueron les acciones de más peligru d'un Real Oviedo qu'adulces diba ganando metros nel campu. Nel minutu 27', los de Calleja aprovecharon a la perfección una falta llateral p'adelantrase nel marcador. Una bona dexada de Oier a centru de Colombatto foi aprovechada por Alemão para, con la testa, poner el primeru. Namás sacar de centru'l cuadru local, l'Oviedo tendría'l segundu con un remate claru de Alemão dende'l cantu de la área. Sicasí, el brasileñu nun llogró impactar bien col balón y el so disparu colóse esviáu.

 

Nel segundu períodu, el Real Oviedo dio un pasu al frente y dende l'entamu foi claru dominador. Paulino y Lucas entraron al campu por Hassan y Oier Luengo y tantu Chaira como'l mesmu Paulino punxeron en serios apuros a los sos marcadores. Nel 63', Alemão tuvo'l segundu de cabeza tres una bona asistencia de Paulino, pero'l porteru local evitólu con una bona intervención.

 

Los de Romo tuvieron l'empate con una falta nel minutu 74 llanzada por Gastón. Un paradón espectacular de Escandell evitó'l 1-1 cuando entrábamos na recta final del choque. Yá nos últimos minutos, el conxuntu uvieín pudo cerrar l'alcuentru pero la falta d'aciertu nos metros finales fixo qu'el 0-1 fora la resultancia final. 

 

Con esta victoria, el Real Oviedo llogra'l primer trunfu del añu y vuelve a los puestos de playoff d'ascensu. Agora, y con tola xornada inda por xugase, los de Javi Calleja yá piensen nel so próximu compromisu ligueru énte'l CD Castellón nel Carlos Tartiere.