L'allegría torna al Carlos Tartiere

El Real Oviedo tornaba esti sábadu al Carlos Tartiere pa encariar una nueva xornada del campeonatu ligueru. Los azules, que llegaben con enfotu tres la victoria énte la UD Las Palmas, encariaben nesta ocasión el partíu correspondiente a la xornada 36 de la LaLiga Smartbank pa midise al CD Lugo. Los d'Álvaro Cervera formaben d'entamu con: Braat, Lucas, David Costas, Dani Calvo, Abel Bretones, Borja Sánchez, Koba, Luismi, Viti, Hugo Rama y Sergi Enrich.

 

Llegaba'l conxuntu azul col enfotu de regala-y un trunfu a el so afición y demostrar dende'l pitíu inicial. Los uvieinos salieron con una marcha más y nun dexaron de buscar la meta rival pa ponese per delantre nel marcador. Cuando se cumplía'l minutu 6, Enrich, nel primer balón que tocaba, nun fallaba y anotaba de cabeza'l primeru. El balear aprovechó la gran asistencia de Lucas p'anotar el primeru y que'l Carlos Tartiere españara de felicidá.

 

El tantu nun camudó la idea del Real Oviedo que siguió buscando insistentemente ampliar la so ventaya. Nel 19', Enrich, nuevamente, a puntu tuvo de poner el segundu na so cuenta particular tres una gran xugaba colectiva ente Borja Sánchez y Lucas. Nesta ocasión, el so remate yera estenáu a córner pol meta del combináu gallegu. Cuando paecía que'l segundu taba a puntu de cayer, una acción bien aldericada terminaba con penalti a favor del Lugo, tres revisión del VAR,

por mano de David Costas. Xavi Torres nun fallaba dende lo once metros y ponía el 1-1 nel lluminosu nel 33'. Los últimos intres de la primer parte siguieron siendo de dominiu azul anque l'empate foi la resultancia final col que se llegaría al descansu.

 

Tres la continuación, Álvaro Cervera introdució un triple cambéu nel minutu 60. Camarasa, Moro y Manu Vallejo entraben al campu en sustitución de Borja

Sánchez, Rama y Koba. L'equipu volvió faese col dominiu y tan solo dos minutos más tarde llegaría'l segundu. Otru gran centru de Lucas dende la derecha yera rematáu nesta ocasión por Manu Vallejo pa volver poner en ventaya a los asturianos. Preciosu remate del "8" de primeres pa bater por baxu a Whalley. Les noticies nun podíen ser meyores pa los intereses uvieinos anque ameyoraríen 5 minutos más tarde. Gui vía la colorada directa tres una dura acción sobre Luismi y dexaba a los suyos con un menos sobro'l campu.

 

Los visitantes apenes s'averaron mientres el segundu tiempu sobro la meta de Braat y l'Uviéu supo xestionar la so ventaya pa sumar un nuevu trunfu bien importante pa los sos intereses. Con esti nuevu trunfu, el carbayones asítiense duodécimos con 46 puntos, once percima del descensu, a falta de que remate la xornada.