Remontada azul para siguir en racha

El Real Oviedo tornaba esti domingu al Carlos Tartiere para encariar una nueva xornada del campeonatu ligueru. Los azules, que llegaben al alcuentru

en sumando trés victories consecutives, encariaben nesta ocasión el partíu correspondiente a la xornada 38 de la LaLiga Smartbank pa midise a la SD

Ponferradina. Los d'Álvaro Cervera formaben d'entamu con: Braat, Lucas, David Costas, Dani Calvo, Abel Bretones, Borja Sánchez, Koba, Camarasa, Viti, Manu Vallejo y Sergi Enrich.

 

Empezó'l partíu con bastante igualdá ente dambos conxuntos anque una acción desafortunada nel minutu 10 rompería l'empate inicial. Un disparu de la Ponferradina topetaba nel brazu de Dani Calvo y el colexáu nun duldó en señalar penalti. Naranjo nun fallaba dende los once metros y anotaba el primer tantu del partíu pa poner per delantre a los bercianos.

 

El conxuntu azul trato de reponese anque nun terminó de llegar con peligru sobro la meta rival. Lucas Ahijado y Abel Bretones protagonizaron per banda

les acciones más peligroses de los carbayones pero los sos centros, lamentablemente, nun atoparon rematador. Nel 29', Borja Sánchez tendría una nueva oportunidá con un disparu dende fora de la área, pero'l so llanzamientu colóse percima del travesal. Nel minutu 30, otra acción desafortunada terminaba col segundu gol de la SD Ponferradina. Un disparu de Dani Ojeda, dende dientro de la área, tocaba n'Abel Bretones y esviaba la so trayectoria pa terminar no fondero de les mallas. 0-2 y final del primer tiempu.

 

La mala primer parte de los azules nada tuvo que ver colo que se se vería nel segundu tiempu. El Real Oviedo salió del vestuariu anováu y nun dexó d'apertar en busca del gol que los metiera nel alcuentru. El botín nun se fixo esperar y nel 48' Viti empezó la remontada. Un gran remate del "7", tres una dexada de Borja Sánchez, superaba a San Román y ponía el 1-2 nel marcador. El Carlos Tartiere veníase enriba y tan solo nueve minutos dempués el municipal uvieín celebraría'l tantu de la igualada. Penalti claru por mano que tresformaba Manu Vallejo a la perfección pa poner l'empate y dexar el choque 2-2 con más de media hora per delantre.

 

Los azules nun quitaron el pie del acelerador y nel 63' Manu Vallejo anotaría'l segundu na so cuenta particular pa certificar la remontada. El gaditano condució a la perfección un contragolpe pa terminar batiendo con un derechazo al porteru visitante. La comunión ente equipu y afición yera total y el Tartiere nun dexaba de celebrar y animar. Col pasu de los minutos, Cervera dio entrada a Moro, Pomares, Mangel, y darréu, a Leo Sequeira y Masca pa cerrar l'alcuentru y poner el broche d'oru a una segunda parte perfecta.

 

Con esti trunfu, los uvieinos suman cuatro victories consecutives y asítiense octavos na tabla con 52 puntos, a falta de que remate la xornada. La primer plantiya va volver al trabayu'l próximu miércoles a partir de les 10:30 hores n'El Requexón.