El Real Oviedo sigue intratable nel Carlos Tartiere y suma asina la so tercer victoria consecutiva nel municipal uvieín. Los de Javi Calleja ganaron por 3-2 al UD Almería gracies a los tantos de Costas, Seoane y Alemão nun partíu sobresaliente del conxuntu azul que s'asitia con quince puntos na tabla antes de viaxar a Málaga.
Entamu inmeyorable y el meyor de la temporada pa los de Javi Calleja. Posesión, llegaes y presión tres perdida fueron una constante tres el pitíu entamu pa un Real Oviedo que tres dellos acercamientos yá s'adelantró nel 12'. Cazorla botó un córner dende la derecha y la so unvió foi precisu, como si d'un guante tratárase, a la cabeza de Costas que ponía'l primeru. El Real Oviedo nun quitó el pie del acelerador y seis minutos más tarde el 2-0 yá yera una realidá. Agora, dende la esquierda, yera Pomares quien s'encargaba d'asistir a Seoane por que con la cabeza punxera'l balón llueñe del algame de Maximiano.
El dominiu carbayón siguía imperando nel terrén de xuegu anque'l Almería nel únicu acercamientu hasta'l momentu llogró retayar distancies. Luis Suárez quedábase mano a mano ante Aarón Escandell y nun perdonaba. 2-1 y frenada a l'allegría y felicidá que reinaba nel Carlos Tartiere. Los últimos minutos el primer periodu nun supunxeron nengún cambéu nel marcador y namá esi tantu encaxáu nun fixo que los azules cuayaren una primera parte sobresaliente.
Tres la continuación, los de Rubi queddaron con unu menos tres la espulsión de Radovanovic por una falta clara sobre Alemão cuando se quedaba solu ante Maximiano. Colorada clara y el Almería tenía que xugar prácticamente tola totalidá de la segunda parte con diez futbolistes. L'allegría carbayono duró poco yá que darréu Luis Suárez ponía l'empate y el segundu na so cuenta particular. 2-2 y tocaba remar.
El partíu entraba nos minutos de la llocura y Alemão nun quería fallar a la so cita col gol. Gol a los trés minutos del empate del brasileñu pa poner al Oviedo otra vegada per delantre nel marcador. Yá na recta final, y tres los cambeos, la UD Almería vía otra tarxeta colorada pa vivir los postreros once minutos con nueve nel campu. La ventaya nel marcador pudo ser mayor pero la falta d'aciertu y les bones acciones de la meta visitante fixeron qu'el 3-2 fora la resultancia definitiva.
Trés puntazos y tercer victoria consecutiva nel Carlos Tartiere pa siguir en llínea ascendente. Próxima xornada pa los nuesos en LaLiga Hypermotion, Málaga CF.
AST
