El Real Oviedo midióse nos dieciseisavos de la Copa del Rei al Atlético de Madrid nuna d'eses nueches con arume de vieyu Tartiere y señardá. Formaben d'entamu los d'Álvaro Cervera con: Tomeu Nadal, Rodri Tarín, Dani Calvo, Lucas, Abel Bretones, Jimmy, Mangel, Hugo Rama, Viti, Koba Leïn y Obeng nun campu que guardaba un rigorosu minutu de silenciu pol fallecimientu de Edson Arantes do Nascimento 'Pelé' antes del pitíu inicial.
Salíen los azules arropaos por una afición qu'apertaba dende l'entamu y que rexistraba una entrada de récord nel Carlos Tartiere. Nun tardaría la grada en glayar los primeres uy tres los disparos de Obeng, en dos causes, y Rodri Tarín tres una falta botada por Hugo Rama que'l central uvieín a puntu tuvo de llevar a la rede defendida por Oblak.
Naide tien qu'afayar la calidá de el xugadores del Atléti. Na primer ocasión na que Griezmann combinaba na redoma de l´área azul asistía a Marcos Llorente que llograba'l 0-1.
Nun aparraba'l conxuntu carbayón que llantaba cara a un cuadru colchoneru que se vía en munches fases del partíu superáu polos locales, que pudieron llograr la igualda tres el pasu por vestuarios. Borja Bastón, relevu de Koba Leïn na segunda metá, cruciaba por demás tres robu y asistencia de Viti, que tamién dispunxo de la suya nel primer tiempu.
Intentólo´l Real Oviedo hasta'l final pero nel 83' les esperances azules dileyéronse col gol de Pablo Barrios que sentenciaba la eliminatoria y devolvía al equipu carbayón a la so realidá, pensar n'Andorra.
