Había que ganar, y ganóse. Nun solo por siguir cola dinámica positiva qu'atesora'l conxuntu azul, si non que tamién por siguir sumando na tabla para algamar los 50 puntos. Los azules impunxéronse por 1-2 énte l'Ibiza.
Pal choque nel Municipal de Can Misses, Álvaro Cervera optó por un once formáu por Quentin Braat, Lucas Ahijado, David Costas, Dani Calvo, Abel Bretones; Vito, Camarasa, Luismi, Hugo Rama; Borja Sánchez y Sergi Enrich, que saltaron al terrén de xuegu del feudu insular coles clares aspiraciones, y el convencimiento, d'encadenar la tercer victoria consecutiva.
La primer metá nun tuvo claro dominador, col control de xuegu por fases pa ca ún de los equipos, que presentaron defenses férrees y bien ordenaes pa evitar les acciones de peligru del so rival. L´Ibiza llegaba más a l´área carbayona, pero fueron los de la capital del Principáu los que llograron primero'l premiu. Lucas dende la esquierda, tres una gran internada, punxo un bon balón sobro la área de Fuzato y Sergi Enrich adelantróse a la defensa ibicenca p'abrir la guerra. Los llocales nun baxaron los brazos y trataron de volver poner la igualada nel marcador. Foi nel minutu 31, cuando a la salida d'un córner Grillo empató'l partíu. La primer parte
acabó con repartida de posesión pa los dos equipos.
Tres el pasu por vestuarios, Cervera dio entrada a Manu Vallejo, que sustituyó a Hugo Rama, primero que'l conxuntu de la capital del Principáu volviera desfacer l'empate. De nuevu Sergi Enrich, tres una gran acción personal, superó a Fuzato con un tiru afechu al palu dende fora de la área. Luengo fixo entrada nel terrén de xuegu, relevando a David Costas. Los postreros diez minutos de partíu concentraron una consecución d'acciones que pudieron marcar el partíu. Álvaro Cervera punxo en tema a Moro, Pomares y Masca. El delanteru portugués anotó'l que sería'l terceru, pero nun xubió al marcador, una y bones el colexáu, cola ayuda del VAR, anuló dichu gol per fora de xuegu. L'Ibiza dispunxo delles acometíes, pero la defensa azul esbaratóles.
Tercer victoria consecutiva pa los d'Álvaro Cervera, qu'algama los 49 puntos na tabla y la próxima xornada van recibir a la SD Ponferradina nel Carlos Tartiere
