Nueve meses y ocho díes dempués del últimu alcuentru con públicu nes graes, nel Francisco de la Hera énte l'Estremadura, el Real Oviedo apostó un choque con siguidores viendo'l partíu en directu, col Municipal de la Isla como escenariu. Encarábase la primer ronda de la Copa del Rei énte'l Coria. Un partíu qu'acabó cola resultancia de 2-3 en favor de los intereses oviedistas.
El Cuco Ziganda punxo en tema un once formáu por Brazão; Johannesson, Edgar, Bolaño, Mossa; Riki, Jimmy, Aburjania, Cedric; Viti y Mujica, que supieron reponese a los tantos anotaos pol conxuntu visitante, consiguiendo'l pase a la segunda ronda de la competición del KO. La primer parte empezó col apodero y la posesión carbayona, qu'acesmaben la meta defendida por Alex Galán. Viti, que foi unu de el xugadores destacaos, dispunxo de la primera, y Mujica, a los pocos minutos, tuvo a puntu de poner el 0-1 nel marcador. Metió primero'l Coria, con una bona contra na que los locales batieron l'arcu defendíu por Brazão, que nun pudo faer nada énte'l tantu cauriense. Siguía'l Real Uviéu teniendo'l control del xuegu, con ocasiones clares de peligru sobro la meta del CD Coria. Viti, tres una bona combinación entre Riki y Aburjania, punxo l'empate nel marcador. Minutos más tarde, al filu del descansu, Mujica adelantró a los de Ziganda. Cola resultancia de 1-2 llegar al ecuador del choque.
Tres el descansu, onde Manolo Parés, presidente en funciones del Real Oviedo, fixo entrega al CD Coria d'una placa conmemorativa del alcuentru, el CD Coria volvió tener acercamientos sobro l'arcu oviedista, con un conxuntu de la capital del Principáu que trató de mete-y más emburrie que los estremeños. Empataron los de la Isla nel 55, y tres ello'l pesu del choque llevólu los de Ziganda, qu'introdució a Javi Mier y Nahuel. Mujica volvió anotar pa los oviedistas, poniendo'l tantu de la victoria nel lluminosu. Samuel Obeng, Sangalli y Lucas tamién cuntaron con minutos nel alcuentru.
Victoria carbayona en La Isla, que sirve pa los de Ziganda avancen na competición del KO. El Real Oviedo va volver esta nueche a la capital del Principáu, onde mañana, en sesión vespertina, va empezar a preparar el partíu d'esti vienres énte la SD Ponferradina.
