La sala de prensa del Carlos Tartiere foi l’escenariu de la presentación oficial de Juan Antonio Anquela como entrenador nuevu del Real Uviéu.
El xienense tuvo acompañáu del presidente de la entidá, Jorge Menéndez Vallina, qu’empezó dando la bienvenida al técnicu uviedista, destacando la predisposición d’Anquela por aunise al proyectu del Real Uviéu: “Munchísimes gracies por aceptar esti retu, va ser importante. Sabes que vienes a un equipu especial por afición, historia y propietariu. Somos conscientes d’ónde tamos y esperamos que consigas los meyores éxitos. Tamos contentos de que teas equí, foi una negociación perfácil y queremos pa ti lo meyor”.
Pela so parte, el técnicu andaluz empezó asegurando que “la historia col Real Uviéu vien de llargo, nun ye la primer vez que tuvi reuníu col club. Anguaño, cuando acabé col mio equipu, el mio representante díxome qu’había la posibilidá de venir al Real Uviéu y nun lo duldé. Falé con Arturo y les sensaciones son bien bones. Lo que fai’l Grupo Carso pol club ye una cosa maraviyosa y esperamos que salga como queremos”. Precisamente, sobre la llamada que tuvo con México, Anquela reconoció que “foi una conversación peratenta, diome la bienvenida y les gracies. En realidá, el que tengo que dar les gracies soi yo por tar equí. Falemos de fútbol, pero yo nel fútbol soi más fácil que la tabla del ún, el fútbol fíxome ser asina, y el mio discursu nun va camudar d’equí a final de temporada”.
Preguntáu sobre lo qu’espera del futuru como preparador uviedista, el xienense asegura que “quiero consiguir lo meyor, y lo meyor ye facer un bon equipu de fútbol, que l’estadiu, onde m’arrespigué cuando vini, disfrute. Vamos intentar lluchar, ser l’equipu que quixi tener siempre”. Amás, sobre’l retu que se marca al frente del bancu carbayón, Anquela señala que “nos equipos nos que toi siempre marco’l mesmu retu, trabayar y dar el máximu. Tengo la oportunidá de facelo nun club maraviyosu como ye’l Real Uviéu y espero tar al altor de lo que significa esti club”.
Tocante a la confección de la plantiya y sobre les posibles llegaes y salíes, el xienense destaca que “cuando falé col club púnxomelo perfácil. Ellos van decidir quién sal y los qu’entren vamos facelo xuntos. Paezme que ye como funciona’l tema y nos díes vinientes va comunicase too. Vengo a construyir un bon equipu de fútbol, cola xente que ta equí, pa depués facelu competir pa da-y la ilusión a l’afición, la ciudá y la xente que compón el Grupo Carso, que ye quien fai medrar esta empresa, y va siguir faciéndolo”.
Sobre les sos preferencies a la hora de buscar xugadores nel mercáu, el preparador uviedista asegura que “tuviemos pocu tiempu y agora toca facer les coses con sosiegu. Yá dixi que cualquiera nun pue ser xugador del Real Uviéu, el Tartiere come a futbolistes mui bonos. Pa trunfar nel Real Uviéu hai que tener les coses clares, competir y aguantar la presión qu’impón la so historia y la so afición”. Amás, el técnicu carbayón reconoz que “hai que dir con tranquilidá. Tol mundu piensa que’l Real Uviéu ye un equipu poderosu, pero’l Real Uviéu mira l’euru y véolo correctísimo. Si viviéremos percima de les nuestres posibilidaes vendríen los problemes. Tenemos que firmar lo que queremos y acertar. Ye como los melones, l’añu pasáu toos bonísimos y anguaño toos pepinos, por eso con tranquilidá y intentar fallar lo menos posible”.
Sobre cuál espera que seya’l sitiu del Real Uviéu nesta temporada nueva en Liga 1|2|3, Juan Antonio Anquela entiende que “el fútbol nun te dexa saber cuál ye’l so sitiu. Mirái los equipos que baxaron, la segunda ye una batalla de contino y tenemos que preparanos. La clave ta en competir y ilusionar a l’afición, quiero ver el campu a arreventar. Con 15.000 retumba y nun quiero figurame cómo pue ser a arreventar”.
Preguntáu sobre cuála va ser la idea de xuegu qu’espera tresmiti-y al so equipu, l’andaluz señala que “esa ye la pregunta del millón. Siempre fui a los equipos con una idea clara de xuegu, pero depués veo, analizo y entiendo la forma na qu’hai que competir. Precisamos bonos futbolistes, qu’aguanten la presión y el ritmu de la Segunda División. Ye una batalla cada partíu y hai que saber perbién qué terrén se tría. Vengo a crear un bon equipu y a trabayar”.
En cuantes a l’ansiedá apalpable alredor por consiguir l’ascensu a la Liga Santander, el xienense entiende que “hai que dir con sosiegu, porque dalgún xubió’l 25 de xunu, como’l Xetafe. Hai que lluchar hasta’l final y si podemos facelo primero, meyor. Esto ye la Segunda División y hai que competir tolos domingos. La igualdá ye terrible, mirái qué equipos baxaron. A primeros de temporada esos equipos taben preparaos pa xubir y agora mira ónde tán. Tenemos que tar preparaos pa competir, trabayando, porque ye la única forma de recoyer los frutos del trabayu”.
Sobre lo que más-y llamó l’atención desque llegó a Uviéu, el técnicu uviedista destaca que “espertóme interés la rueda de prensa, nun fixi nenguna con tanta xente, nun siendo la del día del Real Madrid. Nun vi tantos periodistes y tan xuntos como equí”.
P’acabar, ante la disputa del derby esta temporada, Anquela reconoz que “tien que ser guapísimo. Hai que competir como’l que más pa que la selmana seya dulce, sabiendo lo que representa esi partíu y lo que significa. Tamos preparaos pa que seya perdulce”, sentenció’l xienense.
Depués de la rueda de prensa de presentación, el preparador uviedista saltó al terrén de xuegu, onde un millar d’uviedistes brindáron-y una bienvenida calorosa y deseáron-y suerte. Amás, Anquela allegóse a les instalaciones deportives Tensi pa saludar a los integrantes del primer turnu del Campus Real Uviéu, qu’empieza l’andadura nel día de güei. Ellí los pequeños cantáron-y el cumpleaños feliz al presidente, Jorge Menéndez Vallina, y pudieron entrugar les sos inquietúes al entrenador nuevu amás de da-y tol so ciñu.
