Y que meyor fecha para recuperar la normalidá nel Carlos Tartiere que'l derbi ente'l Sporting de Xixón, con un Carlos Tartiere que rexuntó a 21.056 espectadores qu'afalaron al Real Oviedo mientres los noventa minutos, poniendo'l coloríu azul nes graes del estadiu oviedista.
Femenías; Lucas, Costas, Dani Calvo, Mossa; Viti, Brugman, Jimmy, Borja Sánchez; Obeng y Borja Bastón fueron los escoyíos pol Cuco Ziganda pa saltar d'entamu sobro'l verde del Carlos Tartiere y midise al eternu rival, nun partíu marcáu pola intensidá y l'encruz d'estilos, con un Real Oviedo que foi faciéndose grande sobro'l campu conforme pasaron los minutos.
La primer metá empezó con un Sporting de Xixón que salió a tener el balón, ensin apenes xenerar ocasiones sobro l'arcu de Femenías, y un Real Oviedo perbién ordenáu, demostrando la so fortaleza defensiva, que lu sirvió pa cortar los ataques visitantes y aprovechar les transiciones rápides en busca de les acciones de peligru per banda. Obeng avisó a los venti minutos de xuegu, con un bon tiru que Mariño atayó en dos tiempos. Nel 28 un balón colgáu al segundu palu por Borja Sánchez foi aprovecháu por Lucas pa bater al porteru roxiblancu, desamarrar la llocura nes graes del Tartiere y adelantrar a los de la capital del Principáu. Tres el tantu oviedista los de Ziganda empezaron a da-y posa al ritmu del partíu y fixéronse cola pelota, con posesiones en tres cuartos de campu. Con victoria azul llegóse al descansu del alcuentru.
Tres el pasu por vestuarios, y frutu de la necesidá d'igualar el marcador, el conxuntu de David Gallego trató de meter al Real Oviedo nel so campu, anque los de Ziganda volvieron facer gala del so bon facer defensivu, arreglando les acciones xeneraes polos visitantes. Los azules tuvieron más activos de cara a puerta, con Viti, Obeng y Borja Bastón como principales protagonistes de les ocasiones carbayones. Ziganda dio entrada a Sangalli y a Javi Mier pa da-y aire fresco al equipu. Empató'l conxuntu visitante nel minutu ochenta y dos. Ziganda punxo a Pombo sobro'l verde pa los minutos finales, onde'l conxuntu de la capital del Principáu nun se conformó cola resultancia y buscó ensin tregua'l tantu de la victoria.
Puntu que sabe a poco pa los azules, dempués del partíu d'arguyu, valor y garra qu'esplegaron los de la capital del Principáu sobro'l verde del Carlos Tartiere.
