Partíu l'apostáu esta tarde en Medizorroza ente dos históricos como Deportivo Alavés y Real Oviedo qu'empezó en campu contrario pal conxuntu d'Álvaro Cervera. Y fueron los azules, nesta ocasión cola sacavera, quien dispunxeron de les primeres ocasiones. Nel 4 un córner botáu por Montoro llevó'l peligru a la área local con remate de Rodri Tarín, y nel 13 una
cabalgada de Aceves per banda con centru acabó con remate de Borja Bastón que se coló abargana.
Sicasí, una falta pal Alavés en minutu 16 llevó l'allegría a la grada vitoriana. Repele en primer términu Tomeu Nadal que nada puede facer nel refugue que caza a placer Abqar p'adelantrar a los locales. El balón nun circuló con fluidez en nengún momentu d'esa primer metá del alcuentru y dos imprecisiones en cada área pudieron suponer dos talos goles. La oportunidá pal Real Oviedo nos pies de Bastón que s'aprovechaba d'un erru na zaga local, el so remate, sicasí, nun consiguía furar la meta de Sivera.
La segunda parte empezaba con plasmu pa la portería uvieina, nel 54 falta llateral y gol anuláu tres revisión per posición antirreglamentaria. Buscaba entós la reacción el técnicu carbayón nel banquín con un triple cambéu, salieron Dani Calvo, Obeng y Marcelo Flores y paez que lo notó'l Real Oviedo.
Nel minutu 70 falta llateral non rematada en primer instancia que Marcelo de cabeza devuelve al puntu de penalti, ende Bastón ye letal y tres control, xiru y potente disparu llevaba les tables al eléctrónico.
Paecía que'l Real Oviedo llevaría un puntu de tierres vitorianas pero'l destín quixo ser cruel col conxuntu de la capital del Principáu. Última xugada del partíu, sobro l'agregu de cinco minutos, y un rebote na zanca d'Abel Bretonos terminaba cutiendo la mano del xugador llangreanu que yera sancionada sosprendentemente con penalti. Salva Sevilla nun perdonaba y daba la victoria a los locales dende los 11 metros.
El Real Oviedo va buscar énte'l Villarreal B, el miércoles dende les 19:00 de nuevu como visitante, ganar en Castellón y traer los tres puntos a tierres asturianes.
