Cuco Ziganda apostó pola alliniación habitual nos últimos alcuentros de visitante, con Javi Mier acompañando en punta a Bastón, Viti y Borja Sánchez en bandes. L'Estadiu Gran Canaria presentaba un ambiente propio de la importancia del partíu que dambos equipos xugábense, y un centenar de oviedistas chiscaben d'azul l'estadiu mariellu.
Arrincó bien fuerte l'equipu local, cola primer xugada y primer ocasión clara. Prácticamente nel primer saque de banda a favor oviedista, Borja Bastón chutaba y Sánchez aprovechaba'l refugue de la meta local para anotar el cero a unu. La Unión Deportiva fízolo col dominiu total del balón, y l'emburrie terminó traduciéndose nel empate canariu antes del descansu. Marcaba Moleiro empalando dende la frontera. Entá asina, Brugman tuvo la respuesta nuna contra, a pase de Bastón. Picóla pero colóse raspiando'l poste.
A la vuelta del descansu, los locales diben a por más y llegó el segundu nuna xugada de mala fortuna oviedista, anotáu por Viera. Movió banquín Ziganda, entraron Obeng, Sangalli, Joni Montiel, Hugo Rama y Matheus. Tuvo una clara ocasión Sangalli y al refugue Borja Bastón pero estenó'l porteru. Pierre foi espulsáu por colorada directa y el partíu terminó colos oviedistas intentándolo pero ensin aciertu cola derrota final.
