La Xornada 40 nel calendariu dexónos nel Estadiu de Vallecas un Rayo Vallecanu - Real Oviedo, na nueche del xueves, nel que los azules cayeron por 4-1 ente'l conxuntu madrilanu.
Coles esixencies del calendariu, Ziganda, que yá avisó na previa del últimu choque ente'l Málaga, llevó a cabo rotaciones nel equipu, dando entrada a un once formáu por Femenías; Johannesson, Carlos Hdez., Arribas, Lucas; Viti, Edgar, Jimmy, Obeng, Borja Valle y Blanco Leschuk, que saltaron sobro l'estadiu madrilanu coles mires de siguir sumando pa buscar esguilar puestos na tabla.
Nuna primer parte na que los locales entraron meyor al alcuentru, el Rayu Vallecano adelantróse primero nel marcador, con una xugada pela banda drecha, qu'acabó rematando Comesaña nel segundu palu. Pese al tantu, los de Ziganda aplicáronse en defensa, con bonos minutos pa los de la capital del Principáu, que buscaron facer dañu al equipu de Vallecas dende los balones llargos al llombu de la defensa. Nuna d'estes acciones, Obeng asistió a Blanco Leschuk que superó a Luca Zidane y punxo l'empate nel lluminosu. Col partíu abiertu, con repartida d'acciones pa cada llau, el colexáu Galech Apezteguía convertióse en protagonista, con dos xugaes rigoroses en contra del conxuntu azul, que traxeron dos nuevos tantos pal Rayo Vallecano. Na primera d'elles, con un claru fora de xuegu nel centru previu, el Rayo volvió ponese per delantre nel marcador aprovechando un estene de la zaga oviedista. Ya nos intres finales del primer actu, el colexáu vascu, en siendo llamáu pol VAR, señaló pena máxima a favor de los madrilanos, qu'aprovecharon la ocasión p'asitiar el 3-1 antes del descansu.
Tres el pasu por vestuarios, el partíu nun faltó enforma de lo visto nel primer actu, con un Rayo Vallecano que siguió apoderando la pelota y un Real Oviedo bien asitiáu en defensa, que nun llograba atinar nes transiciones pa salir del so campu. Nuna acción casual Lucas introdució'l balón na so portería, poniendo'l 4-1 nel marcador. Siguió intentándolo el Real Oviedo, pero nun llogró algamar la portería defendida por Luca Zidane.
Derrota del conxuntu oviedista en Vallecas, que va tener una nueva oportunidá de sumar de tres la próxima fin de selmana en el NMR Carlos Tartiere, cola visita del Mirandés.
