L’AD Alcorcón llevó un trunfu del Carlos Tartiere, pola mínima, nuna tarde rara n’estadiu uviedín. La falta de Susaeta obligó a Fernando Hierro a retocar l’equipu, repitiendo l’apueste de Rocha en banda y alliniando a Linares al llau de Toché en punta.
L’Alcorcón salió con más fuercia na primer metá, na que tampoco nun creó demasiao n’ataque. El Real Uviéu garró’l control del balón col pasu de los minutos, pero nun foi hasta pasada la media hora de partíu cuando llegaba la ocasión más clara. Toché remataba cruciao, a pase de Linares, pero Dimitrovic atayaba’l disparu nel área. Apertó’l Real Uviéu nos compases finales previos al descansu, con otra oportunidá pa Toché, que nun foi quién a materializar nel área a pase de Jon Erice. Con un derechazu de Rocha afrellándose en poste llegóse al descansu.
Na segunda metá volvió ser David Rocha’l que lo intentó primero con un disparu dende la frontal que marchó esviáu. El siguiente remate sería de Toché, cabeciando un centru d’Erice que volvió marchar fuera. La defensa alfarera unvió a córner un remate francu de Linares, que diba derechu a gol, y Fernando Hierro buscó más pólvora n’ataque dándo-y entrada a Michu y Nando en cuenta de Rocha y Linares. Foi entós cuando’l Real Uviéu encaxó l’únicu gol del partíu, obra d’Álvaro Giménez, que-y daría’l trunfu al Alcorcón. El Real Uviéu tuvo dende entós el control dafechu del balón, pero ensin aciertu n’ataque. El remate potente de Michu, buscando’l llargueru, marchó a córner, y anque’l conxuntu uviedista apuró n’ataque hasta’l final, foi incapaz a llograr l’empate.
El próximu entrenamientu va ser mañana, a les 10:30 hores, n’El Requexón.
