El Real Uviéu va llegar con vida y posibilidaes de lluchar pol play off d’ascensu a la postrer xornada gracies a la victoria d’esta tarde ante’l Sevilla Atlético nun Carlos Tartiere con una entrada bien baxa, que dacuando amosó l’enfadu col equipu pola racha negativa de resultaos de les últimes xornaes.
Fernando Hierro apostó por da-yos entrada a Saúl Berjón y Miguel Linares nun once titular que notó l’enfadu de bona parte de la grada tanto nel calentamientu como al empezar l’alcuentru. El Real Uviéu controló’l partíu ensin averamientos del filial sevillista y con dos oportunidaes de botes de Miguel Linares y un disparu de Lucas Torró primero del gol. Un centru de Christian Fernández envelenóse y acabó convirtiéndose nel únicu gol d’un partíu nel que’l Real Uviéu goció de munches ocasiones más p’ampliar la ventaya nel marcador. Volvió tenela, na segunda metá, Linares, nun mano a mano delantre d’Ondoa que picó y unvió fuera. Lucas Torró volvió poner a prueba al meta del Sevilla Atlético con un disparu potente dende fuera l’área qu’atrapó en dos tiempos. Otra vez Linares pudo ampliar la renta, depués d’un bon centru de Johanneson que controló nel área, xirando sobre sí mesmu, pero topetando de nuevo col meta sevillista. Toché goció d’una más, con un disparu rasu qu’atrapó Ondoa. Na siguiente, y ensin trabayu pa Juan Carlos, Linares remató nel área y la defensa unvió a córner. De siguío diba ser Susaeta’l que lo diba intentar con un xu potente qu’arrebatió’l porteru del filial sevillista. Les dos últimes túvoles Toché, cabeciando un centru de Christian Fernández dende la esquierda, y Nando, que remató alto un balón na frontal, tres d’un pase de Carlitos.
D’esta manera’l Real Uviéu llega con opciones, anque percomplicaes, a la última xornada pa lluchar pola plaza de play off d’ascensu.
