CD Castellón y Real Oviedo vieron les cares esta tarde en Castalia, con derrota oviedista.
Cola esperiencia de los dos últimos partíos, conscientes de la importancia de salir enchufados dende los primeres compases, el Real Oviedo encaró la xornada 33 en LaLiga Smartbank, con novedaes nel once respectu al partíu del pasáu martes en Santo Domingo. Femenías; Juanjo Nieto, Arribas, Bolaño, Mossa; Sangalli, Edgar, Tejera, Borja Sánchez; Nahuel y Blanco Leschuk fueron los escoyíos por Ziganda para apostar un partíu, nel que los oviedistas fueron cimeros los primeres cuarenta y cinco minutos, pero nun tuvieron atinaos nel segundu actu.
Nuna primer parte, con un Real Oviedo bien expeditivo y activu n'ataque, los de la capital del Principáu ficiéronse col control del balón, bien serios en defensa y desactivando a los locales, que tuvieron metíos nel so campu la mayoría del primer tiempu. N'ataque, los de Ziganda dispunxeron de tres ocasiones clares, con una bona volea de Juanjo Nieto a tiru de Nahuel, un balón de Blanco Leschuk que, tres un retayu na área, sacó la defensa del Castellón y una nueva acción de peligru del arxentín, que, de nuevu, repelió la zaga orellut. El conxuntu local dio un pasu adelantre, nuna fase del alcuentru trabada, con muncha falta y poco xuegu, na qu'a los de Ziganda costó-yos sacar el balón, anque siguieron gociando de les oportunidaes más clares.
Na segunda parte'l guion camudó, sobremanera tres una acción casual entre Edgar y Señé, que rompió'l ritmu del partíu y fixo que tuvieren qu'entrar les asistencies para atender a dambos xugadores. El Castellón anotó a balón paráu y provocó que'l Real Oviedo recuperara'l balón, buscando les bandes para tratar de xenerar peligru y buscar l'empate. Rodri marcó pa los azules, pero l'árbitru anuló'l tanto per fora de xuegu.
Derrota oviedista en Castalia, nun partíu nel que'l Real Oviedo salió meyor, apoderó y dispunxo de les más clares, pero l'aciertu del Castellón na única que tuvo quita a los azules de sumar nel so casillero.
