El Real Oviedo sumó la primer victoria de la temporada nel Carlos Tartiere, gracies al gol de Borja Bastón dende los once metros en provocando él mesmu'l penalty.
Con munches baxes nel equipu, apostó Bolo d'entamu por Marcelo Flores acompañando a Bastón, Sangalli y Abel Bretones en bandes. Debutaba esti postreru, el canteranu, celebrando cumpleaños y firmando un bon partíu. Nel centru del campu, Jimmy al pie de Hugo Rama, y la defensa y porteru de la
primer xornada.
Tuvo delles opciones na primer metá'l conxuntu uvieista. El primer avisu de Marcelo Flores nun disparu rasu qu'atayó Jiménez. La segunda nun remate
forzáu de Bastón, y otra vegada en botes del mexicanu Flores. Ensin apuros en defensa, foise l'equipu ensin goles anque con mayor dominiu al descansu.
Yá na segunda metá, apretó daqué más el Leganés y colos cambeos, enfrescando l'ataque y centru del campu, siguió emburriando'l Real Oviedo afaláu por un Tartiere apurríu colos suyos. Colóse alto un remate de Bretones, y Hugo Rama disparó dende fora de la área. Pisaba más área'l conxuntu oviedista, y llegaba el penalty. Sobro Borja Bastón, que tresformaba dende los once metros poniendo l'unu a cero que-y daba al equipu'l primer trunfu de la temporada, p'allegría del Tartiere.
