El Real Oviedo y Miguel Pérez Cuesta "Michu" llegaron a un alcuerdu pa la incorporación del canteranu, aicionista y abonáu de la nuesa entidá como nuevu secretariu técnicu del club.
Cola salida d'Ángel Martín González, Michu va incorporase darréu al organigrama de la entidá y va empezar desendolcar el so nuevu llabor nel club, cargu qu’ocupaba nel UP Langreo hasta'l momentu.
Formáu nes categoríes inferiores del Real Oviedo, Michu debutó na primer plantiya del Real Oviedo nel añu 2003. Tres un pasu pol fútbol profesional nel Celta de Vigo, Rayo Vallecano, Swansea, Napolés y Langreo, tornó al Real Oviedo na 2016-17, a les ordes de Fernando Hierro, na que sería la so última temporada como futbolista profesional. Michu arrenunció al añu de contratu que-y quedaba como xugador y colgó les botes pa siguir formándose y ocupar la direición deportiva de la Unión Popular de Langreo, d'onde vien agora.
Miguel Pérez Cuesta firma por dos temporaes al mandu de la secretaría técnica oviedista. Nes próximes hores va ser presentáu a la primer plantiya y va entamar trabayar una vegada más, anque n'una fastera distinta, pol so club: el Real Oviedo.
Encantaos de tenete otra vuelta en casa, Michu. Los suaños tán pa cumplise.
