Que l'actitú, la entrega y el compromisu son daqué que nunse negocien sábenlo bien nel vestuariu del Real Oviedo, y güei tamién quedó patente nos 7.614 espectadores que se dieron cita nel Carlos Tartiere para guardar la xornada 23 en LaLiga SmartBank, na que'l conxuntu oviedista viose les cares col Eibar. Un partíu que concluyó con empate (1-1), resultancia que sabe a pocu para los de la capital del Principáu, a mercé del gran choque que cuayaron sobro l'estadiu oviedista.
Pal partíu ente'l conxuntu armeru, el técnicu navarru punxo en tema un once formáu por Femenías; Carlos Isaac, David Costas, Dani Calvo, Pierre; Sangalli, Jimmy, Brugman, Viti; Borja Bastón y Samu Obeng, que llantaron cara al tercer clasificáu de la categoría de plata del fútbol español.
La primer metá empezó con un Real Oviedo bien combativu, faciéndose col control del balón y proponiendo nel campu del Eibar, que vía como los azules llegaben a la meta defendida por Yoel, una y otra vez. Viti, Sangalli y Carlos Isaac avisaron a los armeros, pero sería David Costas, a la salida d'un córner, el qu'engabitaría una bon cabezada pa poner a los de la capital del Principáu per delantre nel marcador. El tantu fixo qu'el Eibar apostára-y la posesión a un Real Oviedo que nun s'achicó, perbién asitiáu defensivamente y con presión alta pa forzar l'erru na salida de balón de los visitantes. Siguíen intentándolo los oviedistas, que vieron nun gran disparu de Brugman una nueva ocasión pa golpiar al Eibar. Yoel unvía a corner, y, de nuevu a balón paráu, el conxuntu azul tendría, con un remate de Dani Calvo, la oportunidá de poner el segundu nel lluminosu, anque'l balón coló por pocu. La primer metá concluyiría con una nueva clara pra los de Ziganda, con Carlos Isaac al segundu palu empalando una gran volea que se foi a la izquierda del arcu de Yoel.
El pasu por vestuarios nun fixo más que reafitar les bones sensaciones carbayones esplegaes mientres los primeres cuarenta y cinco minutos. Posesión, ocasiones y seriedá defensiva amosada polos de Ziganda. Frutu de
la desventaxa nel marcador, el Eibar foi quitar protagonismu a los de la capital del Principáu, pero ensin ocasiones sobro l'arcu de Femenías. Brugman, Viti y Dani Calvo, de nuevu de cabeza, disponen de les ocasiones
más clares pal Real Oviedo. Ziganda movía'l banquín dando entrada a Pombo y Mangel, en primer instancia, y a Jirka, dempués. Precisamente, nel so debú col primer equipu, Mangel tuvo la más clara del partíu con una cabezada a bocaxarru delantre de Yoel, que'l porteru esvió. Lucas y Joni Montiel fueron los últimos cambeos nel equipu oviedista. El Eibar punxo les tables con un gran gol de Tejero a la salida d'un córner. El Real Oviedo nun cesó nel so intentu de llevase la victoria, y dispunxo nes botes de Pombo d'un gran disparu a la escuadra que'l porteru armeru repelió con una gran intervención.
Empate que sabe a poco pal conxuntu oviedista, que cuayó unu de los meyores partíos del añu nel Carlos Tartiere, y que va tener la próxima xornada en Tenerife una ocasión pa volver a la sienda de la victoria.
