El Real Uviéu sumó esta tarde la primer victoria de la temporada nel Carlos Tartiere, nun partíu onde al equipu costó-y averase a la meta catalana nos primeros minutos del alcuentru. El primer averamientu claru foi de Christian Fernández, nun remate de cabeza en llegada al segundu palu.
Johanneson tuvo la siguiente, gracies a un pase mui bonu de Saúl, que lu dexaba delantre d’Edgar Badía, pero’l meta tornó a córner. El primer gol del alcuentru diba llegar de botes de Toché, tres d’un bon centru de Christian Fernández, que l’ariete murcianu remató de chilena nun tantu guapísimu qu’abría la temporada goliadora pal delanteru uviedista. Juan Carlos diba tener qu’intervenir de siguío, nuna bona parada, qu’evitó l’empate a un gol, pero Linares respondió con un bon tiru, depués d’un recorte, que’l porteru del Reus espeyó axustáu al palu. La postrera enantes del descansu foi de Verdés, en remate de cabeza a llanzamientu de córner.
Con dos cambeos obligaos al descansu por lesión, Anquela dio-y entrada a Pucko y Rocha en cuentes de Johanneson y Hidi. L’estremu revolucionó la banda derecha nos primeros compases del segundu tiempu, y peles sos botes pasaron los primeros averamientos, que se tresformaron nel segundu gol de Toché, tres d’un pase del eslovenu, que l’ariete uviedista tocó de primeres firmando’l dos a cero. Saúl Berjón tuvo’l trés a cero nuna xugada individual perguapa, que remató buscando la escuadra, y qu’Edgar Badía unvió a córner. Volvió intentalo l’estremu uviedín, nuna bona contra que fusiló dende la derecha, y que volvió afrellase contra’l porteru del Reus. El tercer y definitivu gol del alcuentru púnxolu Rocha, nun llanzamientu de falta directa perfectu, que sentenció’l partíu. L’equipu va entrenar mañana, dende les 10:30 hores, n’El Requexón.
