Arrincó la segunda vuelta de la competición para'l Real Oviedo, y fízolo en Les Gaunas, con un enfrentamientu énte'l UD Logroñés na sobremesa del domingu.
Femenías; Juanjo, Arribas, Bolaño, Mossa; Sangalli, Javi Mier, Jimmy, Nahuel; Blanco Leschuk y Rodrigo fueron los escoyíos por Ziganda pa encarar el choque énte'l conxuntu rioxanu.
Na primer parte, con poco ritmu y marcada poles interrupciones, el Real Oviedo tuvo perbién entamáu defensivamente. El Logroñés dispunxo de más fluidez col balón, con un conxuntu de la capital del Principáu qu'aprovechó pases llargos pa buscar peligru sobro la meta defendida por Dani Giménez. Les dos más clares del primer actu fueron favorables al Real Oviedo , con un remate al palu de Rodri y un gol anuláu tamién al delanteru sorianu per fora de xuegu.
Tres el pasu por vestuarios, nel que Lucas entró por Mossa, y Arribas retiróse mancáu a los pocos intres de xuegu, siendo Grippo el so relevu, el partíu decantóse del llau azul, con un conxuntu carbayón que buscó la portería local ensin tregua, con delles ocasiones que nun llograron acabar ente los tres palos. Los homes d'ataque, bien activos, metieron al Logroñés nel so campu. Ziganda dio entrada a Borja Valle y Borja Sánchez pa buscar chispa nel ataque, y aprovechar el so desborde pa xenerar unos contra unos sobro la portería del Logroñés. Con un Real Oviedo entornáu n'ataque, Tejera foi l'últimu cambéu de los azules, que nun tuvieron l'aciertu riquíu de cara a portería.
Puntu sumáu nel casillero de los oviedista, que la próxima xornada van vese les cares col Albacete nel NMR Carlos Tartiere.
