Penúltima cita de la temporada nel NMR Carlos Tartiere, qu'acoyó esta tarde un Real Oviedo– Málaga CF, con trunfu uvieista que sirve para algamar los cincuenta puntos, gracies a un golazu de Lucas nel segundu actu.
Con un once formáu por Femenías; Juanjo Nieto, Arribas, Grippo, Lucas; Sangalli, Tejera, Jimmy, Borja Sánchez, Nahuel Leiva y Rodri saltaron los de la capital del Principáu sobre'l feudu oviedista en busca d'una victoria que-yos dexara llegar a los cincuenta puntos.
Nuna primer parte de trámite, na que dambos equipos apostáronse les ocasiones, con una clara para cada llau, Real Oviedo y Málaga plantegaron un entamu de partíu lentu, ensin apenes acercamientos a la área contraria y con muncho xuegu per dientro, coles defenses bien aplicaes para nun conceder ocasiones al rival.
Tres el pasu por vestuarios. el partíu entró nuna fase de más ritmu, colos equipos buscando l´área rival para llograr el tantu de la victoria. Con ataques per banda, aprovechando la subida de los llaterales, y transiciones rápides de balón, los del Cuco Ziganda proponíen más que'l conxuntu malacitano para llograr el premiu del tanto, que llegó con un gran gol de Lucas. Juanjo Nieto punxo un balón dende la drecha, que'l llateral carbayón asitió na escuadra de la meta defendida por Dani Barrio. Ziganda movió'l banquín y dio entrada a Bolaño primero, para dempués facer lo propio con Obeng y Borja Valle. El partíu acabó con un Real Oviedo defendiendo perbién los sos intereses y aprovechando los espacios para correr y anotar el segundu.
Tres puntos capitales para los intereses oviedistas que dexen a los del Cuco Ziganda con 50 puntos na tabla. Los azules van viaxar esti xueves a Vallecas pa vese la cara col Rayo Vallecano.
