Uviéu alendaba fútbol dende l'espertar. Y el Carlos Tartiere nun quixo falla-y al so equipu, para volver animar, y a esfrutar. Con cambeos nel once, la vuelta de Samu Obeng a la punta d'ataque al pie de Borja Bastón, Sangalli en derecha, Viti n'esquierda y David Costas de regresu al centru de la zaga, l'equipu enfrentóse a un Mirandés cola tranquilidá y frescura nel xuegu de quien llega colos deberes fechos.
Primeros minutos y primeros avisos de los oviedistas, con una bien clara de Sangalli, y otra que yá se celebraba de Obeng que salió ganáu nun mano a mano énte'l porteru. Pudo desquitase na siguiente, y firmó el mesmu Obeng el primer gol del partíu. Mientres unos minutos la posesión foi del Mirandés, ensin demasiaos apuros pa los uvieistes. Ocasión pa Javi Mier, y al descansu con ventaya pola mínima.
Yá na segunda volvió tener más emburrie, llegada y pegada el Real Oviedo y el VAR intervieno pa decretar un penalty sobro Marco Sangalli que Borja Bastón convirtió nel 2-0. Joni Montiel anotó'l terceru y definitivu tres una contra de manual que firmó con una terrible sangre fria. El Tartiere volvió vibrar col so equipu y dió un pasu más escontra l'oxetivu final.
