Con Brugman de regresu nel once, un centenar de uvieistes na grada y un Málaga xugándose la permanencia, saltó'l Real Oviedo lluciendo sacavera en La Rosaleda.
Tres unos bonos minutos iniciales de xuegu combinativo, l'equipu foise apagando col pasu de los minutos, apertáu polos locales que con muncha velocidá y circulación llegaben con facilidad pero ensin demasiáu peligru a la meta de Femenías. Defendióse bien el conxuntu oviedista hasta'l descansu.
Na segunda metá y a pesar de nun ser dominador del control del xuegu, llegaba'l Real Oviedo con muncha más claridá a meta rival. A Borja Bastón colóse-y fora por nada tres una bona recuperación de Luismi. Entraron Joni Montiel y Sangalli, y dambos gociaron de la so oportunidá, al igual que Luismi, pero ensin ver puerta. Quemó toles bales n'ataque Ziganda con Hugo Rama, Matheus y Obeng dende'l banquín. Emburrió hasta'l final el Real Oviedo pero solo tascó un puntu, que caltién al equipu invictu dempués de seis victories consecutives y esti empate.
