Y el “Vamos, vamos Oviedo…” retumbó nes graes d'El Toralín. Y el el “Vamos, vamos Oviedo…” llevó en volandes al Real Oviedo a la victoria que sirve para desquitar a los de la capital del Principáu del tropiezu del pasáu xueves en casa énte'l Burgos.
Ziganda tiró de rotaciones, faciendo dellos cambeos respecto al partíu apostáu ente selmana, con seis cares nueves nel equipu que saltó al terrén de xuegu del estadiu bercianu. Femenías; Carlos Isaac, David Costas, Arribas, Mossa; Sangalli, Jimmy, Brugman, Viti; Obeng y Borja Bastón fueron los escoyíos pol preparador navarru pa midise a una Ponferradina que venía n'estáu de gracia, pero que nun llogró reponese de los golpes solmenaos pol equipu de la capital del Principáu.
Na primer metá, onde la Ponferradina llevó'l pesu del partíu, el conxuntu del Cuco Ziganda amosó'l so orde defensivu, faciendo frente a les acometíes bercianes que fueron neutralizaes polos de la capital del Principáu. Los azules ficiéronse al sistema plantegáu polos de Bolu, buscando les contras pa crear peligru a los locales. Obeng, a centru de Viti, adelantró a los oviedistas. Los de Ziganda tendríen nuna combinación ente'l delanteru ghanés y Borja Bastón la oportunidá pa poner el segundu nel lluminosu, pero la defensa berciana cortó'l pase. El choque coló al descansu col 0-1 en favor de el carbayones.
El segundu actu foi un combate de tu a tu ente dambos equipos, con un primer tramu pa los locales, qu'empataron el partíu nos primeres compases del mesmu. El gol dio ales a la Ponferradina, qu'aportunó na busca del segundu, pero s'atopó con un gran Femenías y una defensa seria de los azules. Los de Ziganda fueron adulces llevando'l partíu al so terrén. Borja Sánchez foi'l primer cambéu, col que llegó un nuevu tramu del alcuentru, col Real Oviedo faciéndose cola pelota y coles ocasiones del so llau. Túvola Borja Bastón de chilena, Obeng tamién dispunxo d'una clara énte la meta local, pero sería'l delanteru madrilanu'l que pondría'l tantu de la victoria nos intres finales del choque. Pombo y Jirka entraron antes del tantu, y Dani Calvo sustituyó a Arribas. La defensa oviedista amosóse firme ente les últimes acometíes bercianes, consiguiendo los tres puntos a la fin de los noventa minutos.
Ansiosa victoria de los de la capital del Principáu, que desquita'l tropiezu del últimu alcuentru y asitia a los azules na undécima posición, a tres puntos del Play Off. Los de Ziganda van recibir el próximu domingu, dende les 16:00 hores, al Málaga nel Carlos Tartiere.
