Xornada de llunes para'l Real Oviedo nel NMR Carlos Tartiere, cola visita a la capital del Principáu del CD Lugo, nun partíu qu'acabó cola resultancia de 3-1 en favor de los intereses oviedistas.
Cola vuelta de Ziganda al banquín, en superando la Covid-19, y con un once formáu por Femenías; Juanjo Nieto, Grippo, Bolaño, Mossa; Sangalli, Tejera, Edgar, Borja Sánchez; Nahuel y Blanco Leschuk volvieron los azules al feudu oviedista para buscar romper cola mala racha de resultancies qu'atesoraben nes últimes xornaes, y consiguiólo.
Na primer metá, qu'empezó cola rigorosa amonestación a Edgar nel primer minutu de xuegu, el Real Oviedo salió perbién ordenáu tras, anque'l Lugo empezó faciéndose col control del balón, aprovechando una contra para batir a Femenías, con un tiru dende la esquierda. Tres el tantu, el conxuntu del Anxo Carru metióse nel so campu, buscando les contras para faer dañu a un Real Oviedo que recuperaba'l dominiu del balón. Nuna acción dende la
esquina, un xugador del Lugo cutió'l balón cola mano na área y Ais Reig señaló pena máxima. Tejera nun falló y punxo l'empate nel marcador. Nel tramu final del primer actu, el Real Oviedo tuvo'l balón, pero ensin enllazar balones cola zona d'ataque.
Na continuación, los oviedistas entraron meyor al alcuentru, coles idees clares, sometiendo al Lugo, que s'abelugó nel so campu, pa buscar facer dañu con balones altos para Manu Barreiro. Nuna falta, que cuelga Nahuel, Bolaño aprovecha para poner el 2-1, con un remate de cabeza dende'l centru de l ´área. Javi Mier entró al campu por Nahuel, primero, y Obeng y Carlos Hdez fixeron lo propio dempués. El Lugo buscó dir a pol partíu, sometiendo en delles acciones al conxuntu de Ziganda, pero l'orde defensivu fixo qu'el los de la capital del Principáu nun sufrieren por demás. Barganal de llegar al descuentu, los azules trenzaron una bona xugada, tres un córner, y dende la frontera Juanjo Nieto punxo'l terceru. Viti sustituyó a Tejera nos minutos finales.
Volvió'l Real Oviedo a la sienda de la victoria, con remontada y bones sensaciones, que refuercen no anímico y lo deportivo a los de Ziganda. Mañana, dende les 10:30 hores, los azules van empezar a preparar el choque del próximu llunes énte'l Fuenlabrada.
