96 años de vida, y un llargu día para celebralo. Cola nueche zarrada sobro'l Tartiere arrincaba'l partíu pal equipu, con vuelta al 4-4-2 y regresu de Obeng al once. Fízose ente un Fuenlabrada precisáu de ganar y ente un preciosu tifo que nos recordaba una vegada más la importancia del escudu, nes sos distintes evoluciones históriques, percima de too.
Empezó fuerte la presión del Fuenlabrada y la posesión oviedista. Costába-y llegar al equipu de Ziganda con claridá. Obeng nun atinó na área tres una guapa xugada, con pase de Borja Sánchez a Bastón y este de primeres buscando al so compañeru nel ataque. La siguiente tuvo a los dos Borjas de nuevu como protagonistes. Centru de Sánchez a Bastón, que remataba alto. Aumentando la presencia n'ataque nos compases finales de la primer parte, llegó'l primer gol. Dani Calvo anotaba nun guapu cabezazu, a llanzamientu de córner, l'unu a cero en cantu del descansu.
Yá na segunda'l guión siguió siendo similar, pero con más fortuna. FoiObeng el que, en llegada al segundu palu, emburriaba'l balón que llegaba dende la esquierda y ponía el dos a cero nel marcador. Entraron Javi Mier y Joni Montiel pa enfrescar la medular y sostener l'emburrie del Fuenla que buscaba más llegaes. Nuna bona recuperación y rápida circulación, llegaba'l terceru,firmáu por Javi Mier. Podíen ser más, p'aumentar la fiesta, pero nun entraron les ocasiones clares que siguió xenerando l'equipu, tamién cola entrada de Mossa y Matheus Aiás.
Bon regalu de cumpleaños pa tolos oviedistas que fixeron posible que güei pudiéramos celebrar 96 años de vida.
