Había que sumar de trés, y sumóse. Con esa premisa encaró'l Real Oviedo esta tarde una nueva xornada de competición, recibiendo nel NMR Carlos Tartiere al Real Zaragoza, con victoria azul por 1-0 a la fin del tiempu reglamentariu.
Los del Cuco Ziganda, con un once formáu por Femenías; Juanjo Nieto, Grippo, Bolaño, Lucas; Sangalli, Edgar, Javi Mier, Borja Sánchez; Nahuel y Rodri Ríos, saltaron sobre l'estadiu oviedista sabedores de la importancia de sacar una victoria énte'l conxuntu maño para coyer aire na tabla y mete-y puntos a los puestos baxos de la tabla. Na primer parte, na que'l Real Oviedo salió bien ordenáu, proponiendo y buscando transiciones rápides cola pelota, asturianos y aragoneses midiéronse de tu a tu, con un conxuntu
de la capital del Principáu bien expeditivo, que tuvo la primera nes botes de Rodri Ríos tres una contra de Nahuel. Pasaben los minutos y los del Cuco Ziganda buscaben el xuegu esterior, con Sangalli, Borja y Nahuel, amás de les aportaciones de los llaterales n'ataque, buscando facer dañu al Real Zaragoza dende los lladrales. En defensa los azules tuvieron serios, esbaratando les opciones del conxuntu visitante.
Tres el pasu por vestuarios, Rodri Ríos anotó'l tanto para los azules, con una cabezada a centru de Borja, al que la defensa y el porteru visitante nun pudieron facer nada. Los de Ziganda empezaron a atopase cómodos sobre'l terrén de xuegu, completando bonos minutos. Borja Sánchez, Nahuel y Sangalli dispunxeron de delles ocasiones para ampliar la renta nel lluminosu. El navarru dio entrada a Samuel Obeng y Borja Valle, en primer instancia, para darréu, nel minutu 85, metió a Carlos Hdez. buscando un home más na defensa para neutralizar l'aceleríu final del Zaragoza en busca del empate.
Trés nuevos puntos para los de la capital del Principáu nel NMR Carlos Tartiere, que suman 7 de los postreros nueve puntos, y que dende mañana prepararen el choque del próximu vienres énte'l RCD Espanyol.
