Primer partíu lloñe del Tartiere pero cola afición oviedista movida en masa llevando al so equipu a les arandines n'El Sardineru. Más de 2.000 aficionaos azules anubrieron les cais de la capital cántabra, y tiñeron tamién la grada visitante de Santander nun partíu declaráu d'altu riesgu y que se saldó con un ataque sufiertu polos aficionaos azules nes hores previes al alcuentru.
Formó Jon Perez Bolo col once de la última xornada, pero la primer parte non trascurrió cola fluidez deseyada. Hubo acercamientu per parte de los azules, primero Rodri Tarín rematando a balón paráu y dempués un disparu cruciáu de Borja Bastón que se coló raspiando'l segundu palu.
Tres cambeos al descansu y distintu arranque de la segunda metá. Entraron Borja Sánchez, Montoro y Koba, y l'equipu tomó otru aire. El Var avisó d'una pisotada na área a Galech Apezteguia y Borja Bastón tresformó dende los once metros poniendo el cero a unu nel marcador. Apertó nos siguientes minutos el Racing de Santander pero defendió con orde y criteriu el conxuntu oviedista. Borja Sánchez pudo marcar el segundu, antes d'empecipiase los nueve minutos de tiempu añedíu. Finalmente victoria oviedista y allegría celebrada con unión per equipu y afición.
