La sala de prensa del Carlos Tartiere acoyó esti meudía la presentación oficial d’Osvaldo Alanís como xugador nuevu del Real Uviéu.
L’internacional mexicanu tuvo acompañáu por César Martín, que-y dio la bienvenida, destacando que "ye un defensa central, que pue afacese al llateral. Tien una gran trayectoria nel fútbol y ye un arguyu tenelu equí con nós". Amás, el responsable de Rellaciones Institucionales de la entidá asegura que se tuvieron que dar munches circunstancies pa qu’un xugador de la talla d’Osvaldo tea nel Real Uviéu. Una d’elles foi’l so interés por trunfar nel Real Uviéu y tamién el sofitu d’Arturo Elías, que fixo tolos posibles pa que se fixere realidá. Osvaldo ta con munches ganes y d’equí p’arriba ye ún más de la plantiya. Namás podemos repiti-y el nuestru agradecimientu y esperar que tenga munchos éxitos nel club".
Pela so parte, el mexicanu empezó señalando que "vengo con munchu compromisu de sumar, facer bien les coses nesta gran institución. Tenía la idea de lo grande que ye’l club, de la so historia y de la so afición. Diose la situación y nun lo pensé. Vengo a sumar. El contactu col club vien de llargo, agora faise oficial y toi percontentu".
Sobre’l Real Uviéu y qué ye lo que lu fixo decidise pol club, Alanís afirma que "toos saben de la magnitú d’esti club. Pensé nel proyectu y non na categoría. Vengo pa sumar y consiguir grandes coses. Que tea’l Grupo Carso detrás d’esti proyectu ye tamién un factor que tuvi en cuenta a la hora de firmar por esti gran club. Quiero trabayar y facer bien les coses. Tenemos una gran oportunidá y tenemos que la aprovechar".
Preguntáu sobre la so disponibilidá pal partíu que vien de LaLiga, Osvaldo comenta que "tengo que me poner a puntu, nun puedo dicir una fecha. Cuando tea llistu, voi ser el primeru n’aportar, porque vengo comprometíu y ilusionáu col proyectu".
Tocante a cómo se dieron les negociaciones pa la so incorporación, el central asegura que "el Real Uviéu contactó conmigo va más d’un añu y mediu. Amosáronme’l so interés y fomos falando. Agora pudo facese realidá".
El mexicanu, que siguió un plan específicu d’entrenamientu esta mañana, conoció a los sos compañeros n’El Requexón. Sobre les sos impresiones, el mexicanu comenta que "tuviemos contactu y falemos. Foi un recibimientu bien bonu y ye positivo pa la mio integración. Tenemos un bon equipu y la competencia va facer meyor al grupu. Esto ye fútbol y el que más sume va aprovechar la oportunidá".
P’acabar, sobre la responsabilidá que supón ser el primer mexicanu que viste la camiseta del Real Uviéu depués de la llegada de Carso y lo que supunxo Arturo Elías nel fichaxe, Alanís destaca que "ye grande por ser el primer mexicanu, pero ye un retu más na mio carrera. Tuvi en grandes clubes, na Selección y a la fin esto ye una oportunidá nueva de dalo too. Toi agradecíu a Arturo. Él optó por teneme equí y toi-y peragradecíu, comprometíu col proyectu", sentenció’l mexicanu.
AST
