El Real Oviedo saltaba al Carlos Belmonte con nuevos cambeos nel once de Javi Rozada. Joselu en punta pola obligada ausencia de Ortuño, acompañáu de Borja Sánchez nel enganche. Omar Ramos volvía a la titularidá ensin Bárcenas, con Panamá. Y el centru del campu con Lolo formando al pie de Tejera nel doble pivote.
Los primeros minutos nun fueron malos para un Real Oviedo que nun quería zarapicase nun inestable terrén de xuegu del Carlos Belmonte. Los acercamientos n'ataque llegaba pela banda esquierda. Dos centros de Mossa y Saúl que nun atopaben remate, asocedieron a la ocasión más clara de la primer metá. Chutó Berjón con pocu ángulu pero l'efectu buscaba'l palu llargu y Nadal espurríase estenando'l peligru. Respondió l'Albacete col gol de Dani Ojeda, nun centru de Susaeta, y nun pasó muncho más hasta'l descansu.
Nel entamu de la segunda Juanjo Nieto entró en llugar de Omar Ramos, adelantrando Sangalli la so posición al estremu. L'equipu de Rozada amosaba otra pose sobro'l campu y díbase a pol partíu. Llegaba con peligru'l conxuntu oviedista, con centros de Saúl, remates de Borja Sánchez, y l'entrada de Obeng dende'l banquín pa buscar más frescura n'ataque. Un llanzamientu directu en saque d'esquina de Saúl Berjón estrellábase nel poste y yera precisamente un xenial pase del capitán oviedista el que Sangalli convertía nel empate a unu. Siguió intentándo l'equipu, Nereo intervieno en dos tales paraes pa defender l'empate, y un golazu de Borja Sánchez en cantu del 90 dába-y al Real Oviedo el premiu de los trés puntos, merecíos, nun complicáu campu como'l Carlos Belmonte.
AST
