Nos suaños de los uviedistes quiciabes tuviere una despidida d’añu como la vivida esta tarde nel Carlos Tartiere. La quinta victoria siguida, contundente énte un bon rival, y con un ambiente inmeyorable ente equipu y grada, que volvió convertir l’estadiu uviedista n’inquebrantable.
Con un únicu cambéu nel once, obligáu pola sanción de Yeboah, el Real Uviéu plantó cara a una atrevida Cultural Leonesa que lluchó pol control del balón nos primeros compases del alcuentru, pero atopóse col gol tempraneru d’Aarón Ñíguez, que volvió a la titularidá pela puerta grande. Anotó l’ilicitanu a los diez minutos de partíu y el Real Uviéu empobinó l’alcuentru. Saúl tenía’l segundu poco depués, pero remató alto un centru de Johannesson dende la derecha. Llegaron los meyores minutos de la Cultural, pero’l Real Uviéu trabayó a fondu en defensa. Linares nun llegó a un gran pase de Saúl, tres de recuperación en presión de balón; y Christian Fernández unvió alto un remate de cabeza en llanzamientu de falta de Saúl. La más clara de la primer parte túvola Johannesson, nuna contra que Saúl-y dexó en bandexa, pero tres de la carrera’l defensa uviedista nun pudo nel mano a mano col meta llionés.
Tres del descansu, el Real Uviéu mató l’alcuentru con un gol de Carlos Hernández en falta botada por Berjón y, a pesar de les munches ocasiones, primero d’Aarón qu’afrelló en poste un remate a centru de Mossa y depués de Linares que disparó en delles ocasiones pero atopóse de contino col porteru de la Cultural, foi Cotugno, de cabeza, quién firmó’l tercer y definitivu tantu d’un Real Uviéu que medró de la que pasaben los minutos y disfrutó d’una gran victoria énte un Carlos Tartiere entregáu. Una victoria nueva que va dexar al Real Uviéu recibir el 2018 terceru na clasificación, a un puntu del ascensu directu, p’allegría de l’afición.
