El Real Uviéu llegó a un alcuerdu pa facese colos servicios del defensa Guillermo Cotugno pa les dos temporaes vinientes.
El xugador, de 22 años d'edá, nació'l 12 de marzu de 1995 en Montevideo, Uruguái. Cotugno, internacional sub-20, debutó col Danubio na Primer División uruguaya na temporada 2013-14. Ellí tuvo una temporada, primero d'incorporase al Rubin Kazán rusu, onde completó un total de 33 partíos en dos temporaes. La campaña pasada, Cotugno pasó a formar parte del Talleres de Córdoba, conxuntu arxentín de Primer División, d'onde agora llega procedente.
Guillermo Gotugno ye un llateral de mui bon nivel defensivu, rápidu, que pue afacese al llateral esquierdu.
El futbolista va incorporase yá a los entrenamientos, depués de sometese a reconocimientu médicu na Clínica Asturias, y va trabayar a les órdenes de Juan Antonio Anquela na sesión matinal de güei pa tar a disposición dafechu del técnicu de la qu'empiece la temporada.
Trayectoria:
(2014-15) Danubio
(2015-16) Rubin Kazán
(2016-17) Talleres de Córdoba
La presentación oficial de Cotugno como xugador nuevu del Real Uviéu va facese esti martes a les 17:00 h nel Carlos Tartiere.
El xugador nun va realizar declaraciones hasta'l momentu de la so presentación oficial.
AST
