El Real Uviéu encaxó una derrota doliosa y contundente en Los Pajaritos, nun partíu onde’l conxuntu uviedista viose superáu dafechu por un bon Numancia, qu’empobinó l’alcuentru na primer metá y sentenció na segunda.
Anquela introdució trés cambeos nel once, calteniendo’l sistema. Verdés pol sancionáu Forlín, Johannesson por Cotugno nel llateral y Mossa en banda esquierda, con Saúl na media punta. Los primeros minutos foron de dir y volver con ocasiones pa dambos conxuntos. La más clara foi nun llanzamientu directu de falta, de Saúl Berjón, qu’Aitor Fdez. tornó a córner. Llegaba’l Real Uviéu, pero nun creaba demasiáu peligru na meta del conxuntu sorianu, y Alfonso intervenía con una gran parada na más clara del Numancia. Llegó entós el gol de los locales, obra de Guillermo, cabeciando un centru de Pablo Valcarce. A los cinco minutos yera precisamente Valcarce quien anotaba’l dos a cero pa los locales, dexando al conxuntu uviedista noquiáu antes del descansu.
Na segunda sentenció’l Numancia nel 53, col trés a cero que diba resultar definitivu, obra de Pablo Valcarce, en xugada a balón paráu y depués de dellos refugues de la defensa uviedista. Anquela dio-yos entrada a Linares, Fabbrini y Yeboah, pero tampoco asina atopó reacción nin gol.
Una derrota dura, énte mediu millar d’uviedistes desplazaos, que dexa al Real Uviéu una selmana más fuera de los puestos de play off d’ascensu. L’equipu va volver entamar mañana los entrenamientos, dende les 10:30 hores, n’El Requexón.
