El Real Uviéu nun pudo brinda-y un trunfu a la so afición na estrena de lliga nel Carlos Tartiere. El conxuntu uviedista acabó perdiendo un partíu que se-y punxo llueu de cara, nuna primer xornada onde l’afición nun quixo perder el debú de los sos n’estadiu uviedín.
Los primeros minutos, depués de l’alcordanza a les víctimes de los atentaos de Barcelona y Cambrils, y de los abonaos y ex-xugadores del Real Uviéu finaos, foron pa los locales. Dellos córners y averamientos a la portería d’Alberto, qu’acababen ensin premiu pa los azules, hasta’l gol de Saúl. Un disparu potente, entornáu a la esquierda, colábase cruciáu na meta del conxuntu madrilanu y ponía l’un a cero en marcador. Poco duró l’allegría nel Tartiere, porque a los pocos minutos el Rayo Vallecano llograba l’empate, en xugada a balón paráu. Verdés tuvo la más clara, nun remate de cabeza que nun foi quién a algamar a la salida d’un córner, y el conxuntu madrilanu respondía col segundu antes del descansu.
Empezaba la segunda parte col Real Uviéu buscando l’empate, y Toché nun foi quién a rematar un bon centru de Saúl Berjón dende la esquierda. Llegó entós el tercer gol del Rayo Vallecano, Anquela movió’l bancu pa camudar el sistema y buscar fondura peles bandes, con una defensa de trés y Mossa y Johannesson nos llaos. Alberto intervieno pa tornar un bon remate de Linares, y llegó’l segundu de Saúl Berjón, nuna bona xugada individual, que firmó batiendo a Alberto nun mano a mano énte la meta del conxuntu madrilanu. Linares tuvo la postrera más clara, que s’afrelló en llargueru, y el Real Uviéu buscó l’empate hasta’l noventa ensin atopar premiu.
Primer derrota de la temporada, col equipu volviendo a los entrenamientos el martes a les 10:00 hores n’El Requexón.
