Coles ausencies de Sangalli, Mossa y Lolo, el Real Oviedo de Javi Rozada tampoco pudo cuntar con Saúl Berjón dende l'entamu, y dexó a Joselu, con molesties, refugáu na grada, para recibir nel Tartiere al potente Almería, en puestos d'ascensu directu.
Los primeros minutos del partíu pasaron ensin ocasiones nin llegaes para nengunu de los dos equipos. Javi Fernández nel centru de la defensa, Christian nel llateral, Jimmy sustituyendo a Lolo y Omar y Bárcenas nes bandes, toos ellos novedaes nel once, fueron creciendo col pasu de los nminutos. Los primeros acercamientos, con centros de Christian a Ortuño, terminaron con remates ensin ver portería. Y Bárcenas probaba suerte rematando dende fora de la área, esviáu. Con pocu sobre'l terrén de xuegu llegar al descansu.
Yá na segunda parte meyoró la presencia del Real Oviedo, con munches llegaes y ocasiones. Dos remates de Yoel antes de ser sustituído por Saul terminaron en nada. Salió tamién Riki en llugar de Omar, y el conxuntu oviedista ganó presencia n'ataque. Probó suerte Borja Sánchez rematando fora, y l'últimu cambéu foi Arribas pol mancáu Javi Fernández. Intentólo´l mReal Oviedo pero-y faltó puntería, y na postrera en xugada a balón paráu, remató Arribas fora.
Finalmente un puntu trabayáu, pero qu'a los de Javi Rozada súpo-yos a pocu, por ser nel Carlos Tartiere.
