El Real Uviéu despachó ún de los partíos más completos de la temporada, y fíxolo énte’l meyor rival hasta’l momentu según marcaba la clasificación. Un Cádiz que llegaba no más alto de la tabla, anque con munches baxes, igual que’l conxuntu uviedista, que namás introdució un cambéu nel once en comparanza col de la visita al Molinón, cola entrada d’Aarón en cuenta de Mossa.
El conxuntu uviedista tuvo les primeres oportunidaes de botes de Christian Fernández, nun refugue, y de Saúl Berjón, que dos veces remató buscando puerta. Primero dende la frontal, y marchó raspiando’l poste, y depués de primeres, nun balón que marchó mui alto. La posesión foi en tou momentu pa un Real Uviéu qu’amarró al Cádiz, ensin dexa-y nin siquiera averase a la portería de Juan Carlos.
Na segunda, l’equipu de Anquela volvió salir con too, y el técnicu uviedista nun tardó en facer cambeos y da-y entrada a Owusu y Linares. Llegó entós el gol, en botes de Toché, que controló un pase perfectu ente llinies de Saúl Berjón pa bater a Cifuentes y anotar l’únicu gol del partíu que-y diba dar el trunfu al Real Uviéu nel Carlos Tartiere. Nos últimos minutos el Cádiz reaccionó y punxo a prueba a Juan Carlos, qu’ensin mayores apuros caltuvo a cero la so portería. La postrera de los uviedistes volvió ser pa Sául Berjón, que sacó un disparu potente que marchó raspiando’l llargueru.
El Tartiere acabó coriando l’himnu del Real Uviéu, nuna comunión perfecta col so equipu, qu’un vez más dexó l’alma con premiu en forma de trés puntos y una victoria nueva.
