El Carlos Tartiere acoyó la xornada 9 de LaLiga Smartbank, con un enfrentamientu ente'l Real Oviedo y la UD Logroñés, marcáu poles decisiones arbitrales, nel que'l Real Oviedo perdió por 2-3.
El Cuco Ziganda punxo en tema un once formáu por Brazão; Juanjo Nieto, Grippo, Bolaño, Mossa; Sangalli, Tejera, Edgar, Nahuel; Obeng y Blanco Leschuk, que dende los primeros minutos metiéron-y intensidá al partíu, primiendo la salida de balón del conxuntu rioxanu. N'una d'eses acciones, cuando tan solo trescurrieren seis minutos del alcuentru, los visitantes anotaben na so propia portería, y el Real Oviedo adelantrose nel marcador. A la xugada siguiente, Simone Grippo cometía falta sobro un xugador del Logroñés y, tres revisión del VAR, el colexáu camudaba el color de la cartulina, espulsando al zagueru oviedista. Arribas, en desterciu de Blanco Leschuk, saltó al terrén de xuegu pa reaxustar l'equipu. Magar quedóse con un xugador menos, el Real Oviedo caltúvose bien seriu sobro'l terrén de xuegu, aplicándose en defensa, ensin dexar que los visitantes xeneraren ocasiones de peligru y llegando a portería rival. Al filu del descansu Arribas anotó pa los azules pero'l colexáu, en revisando de nuevu'l VAR, anuló'l tantu.
Tres el pasu por vestuarios el Logroñés, que tenía del so llau'l control del xuegu, anotó por partida doble en dos xugaes aisllaes, que nun fixeron que'l Real Oviedo achicárase y nun buscara xenerar ocasiones sobro l'arcu
defendíu por Santamaría. Obeng punxo l'empate nel marcador, en rematando na área pequena un balón sueltu na área. Sería otra vegada'l Logroñés el que se punxera per delantre nuna xugada de mala suerte pal conxuntu de Ziganda. El navarru dio entrada a Viti y Mujica. El partíu concluyó con un Real Oviedo buscando la área rival, ensin la suerte necesaria pa llograr el tantu del empate.
El Real Oviedo va volver al trabayu mañana, dende les 12:30 hores, n'El Requexón, pa preparar l'alcuentru del próximu sábadu énte la UD Les Palmas.
