A pesar del horariu nun llunes nueche uviedín, el Carlos Tartiere respondió pa recibir al Real Zaragoza, y el Real Uviéu tuvo al altor del so públicu na primer media hora de partíu.
Con dos cambeos nel once en comparanza col del postrer partíu n’Albacete, Forlín y Pucko en cuenta de Rocha y Yeboah, el conxuntu uviedista nun tardó n’adelantase en marcador. Aarón Ñíguez firmaba un auténticu golazu, de falta directa, cuando malpenes trescurrieren cinco minutos de partíu. El segundu firmólu Toché, depués d’un par d’ocasiones clares p’aumentar la renta uviedista. L’ariete aprovechaba un mal espeye y anotaba el dos a cero cuando nun s’algamare la media hora de xuegu. El Real Zaragoza respondía aína, col dos a un, y diba empatar Zapater tamién con un llanzamientu directu de falta. Asina se llegaba al descansu, y el Real Uviéu colaba ensin ventaya en marcador.
Na segunda tanto los uviedistes como’l conxuntu aragonés aparcaron el so xuegu allegre n’ataque buscando minimizar equivocos, y Juan Carlos diba intervenir dos veces, un mano a mano claru con Borja Iglesias, pa salvar el puntu. Ensin demasiáu peligru n’ataque, el Real Uviéu zarraba l’empate énte la so xente, volviendo sumar nel Carlos Tartiere.
