El Real Uviéu llegó a un alcuerdu pa facese colos servicios del media punta Diego Fabbrini, en calidá de cedíu, pa la temporada que vien.
El xugador, de 26 años d’edá, nació’l 31 de xunetu de 1990 en San Giuliano Terme, Italia. Debutó con 19 años nel Empoli FC, onde militó dos temporaes xugando un total de 60 partíos y anotando trés goles. Nel 2011 incorporóse a les files del Udinese, onde permaneció hasta’l 2013 y col que debutó na Serie A italiana, participando nun total de 38 partíos y marcando trés goles, Fabrinni fichó pola Unione Sportiva Città di Palermo. Dende entós la so trayectoria deportiva desenvolvióse n’Inglaterra, onde militó en Watford, Millwall, Middlesbrough y Birmingham, club del que llega en propiedá.
Internacional absolutu con Italia nuna ocasión, Fabbrini debutó cola “Azzurra" el 15 d’agostu del 2012, nun alcuentru amistosu énte Inglaterra.
Diego Fabrinni llega en calidá de cedíu dende’l Birmingham y ye un media punta que destaca pola so habilidá y la so trayectoria tan amplia a los sos 26 años d’edá.
El futbolista va incorporase nel intre a los entrenamientos, depués de sometese esta mañana a reconocencia médica na Clínica Asturias, y va trabayar a les órdenes de Juan Antonio Anquela na sesión d’esta tarde pa tar a disposición dafechu del técnicu de la qu’empiece la temporada.
Trayectoria:
(2009/11) Empoli FC
(2011/13) Udinese FC
(2013) Palermo
(2013-14) Watford
(2014) Siena
(2014/15) Watford, Millwall, Birmingham City
(2015-16) Middlesbrough y Birmingham City
(2016-17) Spezia
La presentación oficial de Fabbrini como xugador nuevu del Real Uviéu va facese mañana a les 13 h nel Carlos Tartiere.
El xugador nun va realizar declaraciones hasta’l momentu de la so presentación oficial.
