El Real Uviéu volvió p’Asturies de vacío depués d’encaxar otra derrota más lloñe del Carlos Tartiere. Santo Domingo presentaba un gran ambiente, con mediu centenar d’aficionaos uviedistes desplazaos, y Anquela repitía once al respective del que s’impunxo na xornada anterior al Córdoba.
Toché, a pesar de les molesties de los últimos díes, foi de la partida, y los primeros averamientos yeren del conxuntu uviedista. Un par de xugaes a balón paráu, un xu de Saúl Berjón entornáu a la esquierda, o una bona xugada d’Aarón Ñíguez que tornaba la defensa cuando se llantaba solu énte Casto decantaben los primeros minutos pa los azules. La más clara p’adelantase en marcador túvola Toché, cabeciando un balón que coló esviao por poco, primero de tener que se retirar por lesión. Owusu sustituyó al ariete uviedista n’ataque cuando trescurriere media hora de partíu, y l’Alcorcón anotaba cinco minutos más tarde. De toles maneres, a puntu del descansu, un centru de Mossa dende la raya de fondu pasaba énte la meta de Casto ensin atopar rematador en segundu palu.
Na segunda metá l’Alcorcón aumentó la llegada n’ataque, y de la xugada que podía suponer l’empate pal Real Uviéu, na qu’Aarón tardó demasiao nel control y tapó la defensa antes del remate, llegaba’l segundu del Alcorcón, qu’a lo postrero diba sentenciar el partíu. Yeboah y nos últimos minutos Linares foron los dos cambeos qu’Anquela decidió introducir pa buscar la reacción, pero’l Real Uviéu nun foi quién a xenerar abondo n’ataque. L’Alcorcón tuvo un disparu al palu, y Casto sacó una mano providencial pa evitar el dos a un, en remate d’Owusu.
A la fin, una derrota más que nun dexa al Real Uviéu allargar les sensaciones positives llograes na última xornada.
